„Наставничкиот пленум останува на став дека треба да се укине оваа форма на екстерно тестирање и целта со која се воведе. Тоа што е потребно во образовниот систем во Македонија е екстерно тестирање кое ќе помогне да се дијагностицираат проблемите“, изјави за ЦИВИЛ Медиа, професорката Фросина Митрушева, член на Наставничкиот пленум.
Митрушева е со став дека екстерното тестирање претставува политика на притисок.
„И во Министерството за образование се свесни дека не произлегуваат релевантни резултати и дека нема позитивен ефект, но не сакат да признаат дека згрешиле. Сметаме дека одлуката на Уставниот суд за укинување на нашата иницијатива е политичка одлука“, вели Митрушевска, како реакција на последната одлука на Уставниот суд да ја отфрли и втората иницијатива за укинување на екстерното тестирање. Втората иницијатива ја поднесе до судот Наставничкиот пленум во 2016-тата. Сепак, мнозинството од уставните судии сметале дека иницијативата е стара и не е во согласност со Уставот на Македонија.
Донесувањето на одлуката беше проследено со дискусија меѓу судиите со различни ставови по ова прашање. „Некои решенија се уште важат, а некои – не. На овој начин се создава правна несигурност, која задира во правата на наставниците и на учениците“, истакна уставната судивка Наташа Габер.
За судијата известител Владимир Стојановски, ако претходно Уставниот суд не повел постапка по ова прашање, нема зошто да поведува сега, затоа што според него, ништо не е променето.
Осврнувајќи се на проблематичноста на воведувањето на екстерно тестирање Митрушева, потсети на ставот на Сафет Незири, државен советник во Министерството за образование.
„На дебатата посветена на екстерното тестирање на телевизија Телма, Незири, како трет човек во Министерството за образование, изјави дека не зависи од министерството дали ќе има или ќе нема екстерно тестирање. Ова изјава во најмала рака е чудна, особено кога доаѓа од некој на толку висока позиција во институција која е одговорна за спроведување на екстерното тестирање“, смета професорката.
Екстерното тестирање оваа година ќе опфати 18.600 ученици од завршните години во средното образование. Поради продолжување на зимскиот распуст, екстерната проверка на знаењето на учениците ќе се спроведе од 30 јануари до 3 февруари 2017 година.
М. Теговска
