Државната изборна комисија на 9 август го става Избирачкиот список на јавен увид за престојниот референдум на 30 септември. Во меѓувреме новиот состав на ДИК го продолжува рокот за поднесување ценовници за медиумско претставување до утре.
Со Изборниот законик само овластениот предлагач, односно Собранието има привилегиран пристап до услугите, кои ги обезбедуват радиодифузерите, печатените медиуми и електронските медиуми (интернет порталите), предвидени со Изборниот законик. Сите останати учесници во референдумот имаат право на медиумско претставување поврзано со референдумот, но пристапот до услугите на медиумите е под пазарни услови, согласно правилата и политиките за платено рекламирање на секој медиум.
Истовремено, ВМРО-ДПМНЕ не пропушта секјдневно да го оспорува Договорот со Грција, но порадикални чекори презеде Јанко Бачев од партијата Единствена Македонија, кој потпиша Меморандум за стратешка соработка за бојкот на референдумот преку Кризен штаб кој ќе пропагира воопшто да не се излезе на гласање, со повеќе партии, граѓански организации и здруженија од македонската дијаспора. СДСМ, исто така, започна со кампања за референдумот. Во нивното денешно соопштение уште еднаш ги потсетија граѓанките и граѓаните дека на 30 септември тие ќе го имаат последниот збор за иднината на Македонија и влез во ЕУ и НАТО.
Австрискиот канцелар Себастијан Курц, на 7 септември ќе ја посети Македонија, на три недели пред закажаниот референдум за промена на името, со кој треба да се реши спорот со Грција. Курц во Македонија доаѓа на покана на премиерот Зоран Заев, кој пред референдумот има покането и неколку други европски лидери. При последната посета на Заев на Виена, на крајот на јуни, Курц упати апел до граѓаните на Македонија на референдумот да гласаат за новото име „Северна Македонија˝.
На крајот сите оставаат демократски и транспарентно, граѓаните да одлучат дали ќе гласаат ЗА или ПРОТИВ или целосно ќе бојкотираат. Да се излезе на референдум или да не се излезе?
Интересно, но Министерот без ресор, задолжен за имплементација на Стратегијата за Роми 2014-2020, Аксел Ахмедовски и здружението на граѓани „Ромаверзитас“, по повод 2 август – Ден на Геноцидот врз Ромите од Втората светска војна, денеска, 6 август организираа комеморација во знак на сеќавање на жртвите од овој Геноцид. На комеморацијата присуствуаше и пратеникот Самка Ибраимовски. Според медиумите и министерот и пратеникот се разочарани од посетата на овој настан.
Денеска се одбележуваат и 2 години од невремето и катастрофалната поплава во скопско Стајковци и околината кога загинаа 22 лица. По тој повод, под мотото „Да не се заборави и никогаш да не се повтори“, градоначалникот на општина Гази Баба, Борис Георгиевски, вечерва на плоштадот во Стајковци ќе додели повеќе од 200 благодарници на институции, јавни претпријатија, фирми, здруженија, на граѓани и волонтери кои доброволно помогнаа за време на поплавите.
Министерството за труд и социјална политика денеска итно реагираше по објавувањето на видео на социјалните мрежи од градинката „Детска радост“ во Гевгелија каде воспитувачката со погрдни зборови му се обраќа на дете. Од МТСП велат дека за најкраток можен рок ќе го расветлат случајот и ќе ја известат јавноста.
Б. Јордановска