Разговор со поетесата Тања Кармзова Костиглиола, која живее и работи во Париз, за состојбата во Париз и како се снаоѓаат граѓаните во време на пандемија, лажните вести поврзани со КОВИД-19 и нејзиното творење во овие моменти.
ЦИВИЛ МЕДИА: Разговарам со поетесата Тања Кармзова Костиглиола, наша сонародничка која живее и работи во Париз. Здраво Тања, како живее Париз во овој период на пандемијата? Како си ти?
КАРМЗОВА КОСТИГЛИОЛА: Париз е тивок, има многу малку движење низ градот речиси сè е затворено, отворени се само есенцијалните бизниси за прехранбена индустрија, аптеки, болници, и тоа што мора да работи за да функционира општеството.
Освен што пишувам, работам во аптека, така што секојдневно сме соочени со пандемијата, и се снаоѓаме како што можеме.
ЦИВИЛ МЕДИА: На што се жалат Парижани најмногу? Што им недостасува најмногу?
КАРМЗОВА КОСТИГЛИОЛА: Парижани се жалат дека им недостигаат прошетките, како и на сите. Имаат проблем што не можат да одат на одмор. Тоа што мораат да останат дома. Многумина сè уште се во апартмани, во станови, други се во куќи, верувам дека овој период е прилично тежок да се живее затворен дома.
ЦИВИЛ МЕДИА: Тања, освен што владее пандемија, која на еден чуден начин ги зближи сите луѓе на оваа планета, паралелно со пандемијата во тек е инфодемијата која, се чини, се шири дури и побрзо од самата пандемија. Дали парижаните, Французите воопшто, се лесен плен на лажните вести и митовите, на теориите на заговорот, поврзани со корона вирусот? колку тие им веруваат на лажните вести, а колку се потпираат на официјални, потврдени извори?
КАРМЗОВА КОСТИГЛИОЛА: Мислам дека мнозинството претпочита да ги слуша соодветните, компетентните организации, институции, имаме телевизиски канали кои се со 24 часа само со вести, каде редовно се прави комплетно објаснување, статистика и новости на таа тема. Луѓето се прилично добро информирани. Ние како здравствени работници сме овде исто така, доаѓаат нè прашуваат, редовно одговараме на вакви прашања, во рамките на нашата можност. Бидејќи ние не можеме да се замениме со виролози или епидемиолози, можеме да дадеме само некои основни совети за хигиена, за превенција, за како да се намали тој импакт директно врз популацијата.
Лажни вести секогаш имало ова не е првпат, има и сатирични весници кои пишуваат на таа тема, наше е да ги избереме сопствените извори од кои ќе се информираме. Наше е исто да информираме кога има лажни вести, сега имаме алатки да сигнализираме лажни вести, кревање паника, лоши хигиенски совети. Голема фама има за лековите кои би помогнале, за превенција да се лечат, затоа мора многу да се внимава за да нема потоа трајни последици, затоа што тоа е најголемиот ризик.
ЦИВИЛ МЕДИА: Дали луѓето доаѓаат во аптека и бараат лекови на своја рака во уверување дека тој ќе ги заштити или излечи?
КАРМЗОВА КОСТИГЛИОЛА: Го имаме сега најсвежиот случај, случајот со Xидроксиклорокин и Aзитромицин, значи Сумамед кај нас. Луѓето ги бараат овие лекови, за кои сеуште ниту епидемиолозите ниту виролозите не можат да се согласат, затоа што нема студии, има сериозни етапи пред да се докаже било каква ефикасност за вакви лекови.
ЦИВИЛ МЕДИА: Дали корона вирусот е инспирација за тебе? Дали и што пишуваш?
КАРМЗОВА КОСТИГЛИОЛА: Пишувам редовно, во облик на реакции, на туѓи пишувања, некогаш е поезија, некогаш само размислувања. Моментално поезијата ми е ставена на пауза, иако имам стихови напишано околу тоа, помалку се, не се уште објавени, не циркулираат на социјалните мрежи, затоа што не мислам дека сега е времето за тоа.
разговорот го водеше: Џабир Дерала
монтажа и обработка на текст: Ариан Мехмети