На документот доставен до дипломатската заедница од ВМРО-ДПМНЕ, што ЦИВИЛ Медиа го објави како „Дипломатска офанзива на Груевски и соработиците“ реагираше и невладината организација КХАМ од Делчево, исто така обвинети за поткуп на гласачи.
Во продолжение целосниот демант доставен до редакцијата на ЦИВИЛ Медиа.
„Во врска со текстот „Дипломатска офанзива на Груевски и соработниците“, споменато е името на НВО КХАМ, како организација која делува во општините Берово и Македонска Каменица. Во таа смисла се чувствуваме повикани да објасниме и да ги демантираме наодите во текстот и да Ве информираме сите наводи изнесени во текстот, односно од документот кој Груевски го доставува до дипломатските претставништва во Р.Македонија, се неточни и невистинити.
НВО КХАМ, како невладина организација има своја канцеларија во Делчево, Виница и с. Црник-Пехчево и дека нашата организација нема канцеларија во М.Каменица, ниту во Берово и нема никакви проектни или какви било активности во овие две општини кои сеспоменати во документот кој Вие го објавивте.
Овие наводи ние ги сметаме за тенденциозни и се продолжение на начинот на кој Владата на Груевски го практикуваше односот кон невладиниот сектор и кон нашата организација. Па, во таа смисла, илузорни се тврдењата дека НВО КХАМ се впушта во каква и да е политичка кампања. Според нас, сето ова е со цел да се сруши угледот на НВО КХАМ која 19 години работи како граѓанска организација застапувајќи ги интересите на ромската популација и другите маргинализирани групи во регионот. Мора да истакнеме дека нашата матична канцеларија е лоцирана во Делчево и нема релации со Општина Берово и Општина Македонска Каменица.
НВО КХАМ од Делчево е корисник на грантови од ЕУ, РЕФ Будимпешта, РИО, Швајцарската агенција за развој и соработка, како и ФООМ, а во периодот од 19 години колку што постоиме, сме реализирале над 60 проекти во областа на образованието, здравството, вработување, човекови прав и социјална инклузија. Во нашата организација работно се ангажирани 35 лица од трите општини, Делчево, Виница и ц. Црник-Пехчево.
Сакаме да истакнеме дека граѓанскиот сектор е темел на едно демократско општество, носител на демократските промени и кректор на лошите политички на една власт. НВО КХАМ нема потреба да поткупува гласачи за ниту една политичка опција, тоа е одлика на тие што обвинуваат, туку напротив ние ги застапуваме интересите на граѓаните, како и јакнење на свеста кај граѓаните за правото на избор и дека нивниот глас е нивно право. Само на тој начин може да се развива демократскиот капацитет на едно општество“, се вели во дописот на КХАМ од Делчево.