Чистење, реновирање, рестарвирање или изградба на црква во село Галате, општина Врапчиште, запирање на активностите околу црквата со интервенција на полицијата, (иако воопшто не станува збор за изградба на црква), упад на граѓани во Општина Врапчиште, двајца приведени во Општината, па ослободени во полициска станица. Вака изгледаше вчерашниот ден околу случајот за црквата Св. Петка во с. Галате, која изгоре во пожар во 2001 година.
За обидот за создавање меѓуетнички и меѓурелигиски тензии околу случајот со црквата Св. Петка во госитварско политичките партии (власта и опозицијата) си ја префрлуваат топката.
Премиерот Христијан Мицкоски одговарајќи на новинарско прашање кој е неговиот коментар во однос настаните во црквата во селото Галате, општина Врапчиште вели дека цело време предупредувал дека не треба да се игра на етничка и верска карта, бидејќи тоа е картата на којашто криминалците коишто изминатите години печалеа на грбот на народот ќе се обидат да предизвикаат нестабилност и така натаму и ова се такви изолирани инциденти коишто ќе следат.
„Вие ја слушнавте изјавата и на Владиката, слушнавте и ја прочитавте прес конференцијата којшто се оградува од ваквите инциденти, жителите на село Галате коишто исто така се оградуваат од ваквите инциденти. Но, она што е интересно е што на социјалните медиуми на едно од лицата, излегоа некои слики коишто го гледаат во друштво на политички активни ликови, ако се земе предвид и политичката провениенција и поддршката на градоначалникот во општина Врапчиште, но и се уште полициската структура којашто е во ОВР Гостивар, тогаш многу лесно може да се дојде до заклучокот дека ова е дел од оној фолклор којшто се подготвува за сеење етничка, верска нетрпеливост и обид за дестабилизација, вели Мицкоски.
Тој додаде дека инциденти од овој тип ќе има во периодот којшто следи.
„И ваков тип на инциденти ќе има и во периодот кој што следи. Зошто? Затоа што не можеме, како Влада, имајќи ги предвид последните измени во Законот за полиција и Законот за работа на Министерството за внатрешни работи, да се случат промените во раководните структури, бидејќи тие се лимитирани на пет години искуство на висока позиција, вие знаете седум години кои беа кај нас во Влада во Македонија, така што ќе мора за следните два-три месеца да се случи измена на тој Закон за да настане измена во тие раководни структури за да можеме реално да ја контролираме ситуацијата. Инаку во периодот немојте да имате дилема дека овие корумпирани политички елити од минатото, ќе се обидат преку своите центри сеуште на влијание во секакви институции да создаваат етнички конфликти и тензии, но ние ја контролираме ситуацијата“, рече тој и додаде дека брзо се реагира и нема поддршка од страна на жителите.
Мицкоски додаде дека брзо се реши и оваа ситуација, бидејќи не наидува на поддршка кај населението, самите жители на село Галате го отфрлија сето ова, самиот Владика на Гостиварско-полошката епархија го отфрли сето ова.
„Да не дозволиме вакви корумпирани сеништа од минатото да нѐ влечат назад. Мора да одиме напред и мора да се бориме да одиме напред“, дециден е Мицкоски.
СДСМ го осудуваат приведувањето за црквата во Галате, бараат институциите преку дијалог да најдат решение
Пратеникот на СДСМ, Оливер Спасовски го осудува приведувањето на било кој во еден ваков случај и секако дека не треба да се посегнува на таков начин на однесување кога станува збор за верски објекти, институциите треба преку дијалог да најдат соодветно решение, рече .
„На Македонија не и се потребни инциденти, особено не во делот на меѓуетничките односи, апсолутно не смееме да се играме со правото на вероисповед. Се што треба да се решава треба да помеѓу институциите на системот, дали е тоа МПЦ, ИВЗ, Католичката црква, локалната власт и централната власт. Преку дијалог мора да се дојде до решение“, рече Спасовски.
Петровска: Откако ги реши сите криминалци кои јуришаат по улиците, власта реши да апси и чесни граѓани кои реставрираат црква
„Веројатно властите ги решија сите криминалци кои јуришаат по улиците деновиве и решија да апсат чесни граѓани, христијани, верници во Бога кои со лични средства сакаат да ја реставрираат православната црква Св. Петка во атарот на селото Галате, гостиварско“ напиша на социјалните мрежи пратеничката од СДСМ, Славјанка Петровска.
Таа додаде дека властите прво лажеше оти обвинителство наредило апсење, па откако јавното обвинителство демантираше, граѓаните биле обвинети за узурпација на земјиште.
„Узурпација на земјиште на кое црквата е изградена пред повеќе од 30 години? Срамота!“ напиша Петровска.
Пратеничката од СДСМ запраша дали некој ја видел нејзината колешка од ВМРО-ДПМНЕ, Дафина Стојаноска која пред изборите врескала дека никој не може да го тормози македонскиот народ.
„Ама не ѝ било до македонскиот народ, на неа и на ДПМНЕ, до власта им било“, потенцираше Петровска.
Костовски: Христијани и мои Македонци за оваа не се молчи, оваа во турско не било
„Господе прости им, не знаат што прават!, објави поранешниот пратеникот на СДСМ, Мартин Костовски.
„Да апсиш одговорни луѓе, искрени верници кои сами се организирале да уредат свое светилиште-црква во своја земја е она што ја прелева чашата.Христијани и мои Македонци за оваа не се молчи, оваа во турско не било. Повикувам на гласност и поддршка од сите верници и од сите вери, правото на вера во Бога никој на никого не може и не смее да забрани! Поддршка за граѓаните од с.Галате Гостиварско за реконструкција на црквата Св.Петка со Вас сме“, пишува Костовски.
Алијанса на Села за случајот со црквата во с. Галате: ВМРО-ДПМНЕ поттикнува тензии и дестабилизација
„Поттикнувањето на моноетничката и антиалбанската влада да поставува крстови и цркви во секое населено место, узурпирање на јавен имот и без потребната дозвола и документација, е еден од најопасните облици што им наштетуваат на меѓуетничките односи и предизвикуваат тензии во земјата.
Откако градоначалникот Шабани и општинскиот инспекторат ги прекинаа незаконските работи и узурпацијата на земјиштето кај црквата во Галате, ВМРО-ДПМНЕ мобилизираше милитанти од Гостивар и го блокираше објектот на Општина Врапчиште, заканувајќи се и загрозувајќи го градоначалникот на општината“, обвинуваат од опозициската партија.
Од редовите на Села прашуваат „дали ова е уште еден доказ дека премиерот Христијан Мицкоски и неговите партнери сакаат сценарија за дестабилизација по секоја цена?“.
АА објави и дека извесен Душко Павловски бил еден од главните организатори за, како што велат, упадот во општината, по што тој и уште едно лице биле уапсени од полицијата.
„Она што треба да ѝ се разјасни на јавноста е каква била поврзаноста и улогата во ова сценарио на Арбен Таравари и неговиот наследник на чело на општина Гостивар, Валбон Лимани. Павловски објавил фотографија на која се гледа блискоста што ја имаат и јасно се гледа дека станува збор за цврсти односи меѓу двете лица. Во меѓувреме, блиската врска меѓу Таравари и Павловски одамна е познат факт за гостиварци“, велат од партијата на Села, објавувајќи фотографија од Павловски и Лимани.
МВР: Било кое подгревање на меѓуетнички и меѓурелигиски тензии било на јавен простор или преку социјални медиуми ќе биде предмет на кривично-правен прогон
Министерството за внатрешни работи упати апел за воздржување од било какви тензии по однос на овој настан. Било кое подгревање на меѓуетнички и меѓурелигиски тензии било на јавен простор или преку социјални медиуми ќе биде предмет на кривично-правен прогон од страна на МВР.
„МВР ја известува јавноста дека денеска (10.09.2024) во 10 часот од страна на полициски службеници од НККР Гостивар, градежен инспектор од општина Врапчиште и ангажирана геодетска фирма извршен е увид на локацијата каде се наоѓа црквата во атарот на с. Галате. Увидот е извршен по претходно отворена пријава на 09.09.2024 од страна на инспектор за урбанизам при општина Врапчиште за бесправна градба на оваа локација, а по завршување на увидот, од страна на градежниот инспектор местото е околчено со арматури и трака“, се вели во соопштението на МВР.
Како што објсунуваат, околу 15 часот од страна на лицето Д.П., во присуство на неколку граѓани, отстранета е арматурата и траката, по што групата граѓани се упатиле пред општина Врапчиште, каде се одржал мирен протест. Потоа Д.П. и уште две лица, дел од траката е залепена преку влезната врата на општината, а по извесно време Д.П. со група од околу 10 луѓе влегува во објектот на општината, со цел да бидат примени од страна на градоначалникот Исен Шабани.
Градоначалникот се согласил да ги прими, но со услов разговорот да не се снима со приватни телефони. Групата граѓани одбиле да го направат тоа и градоначалникот побарал да го напуштат објектот. Откако не го напуштиле, градоначалникот побарал од полициските службеници да го испразнат објектот, по што од страна на полициските службеници при ПС ОН Гостивар на групата граѓани им е дадена наредба да го напуштат објектот на општината, нешто кое Д.П. и уште едно лице одбиле да го направат и пружиле активен отпор на полициските службеници.
„Двете лица се приведени во просториите на ПС Гостивар и по извршен службен разговор со нив и направена консултација со јавен обвинител, истите се пуштени да си одат“, велат од МВР.
Од МВР потсетуваат дека македонското општество е засновано на меѓусебна почит и толеранција, а нашите темелни уставни вредности се гарант дека никој нема право да ги користи верските прашања во дневно-политички цели.
„МВР ќе направи средби со сите чинители кои можат да придонесат за расчистување на овој настан“, се вели во соопштението.
Дехран Муратов
