пишува: ДИЈАНА ТАХИРИ
Една од најризичните категории воопшто подложни на инфекции, а особено на Ковид-19, се највозрасните граѓани, пензионерите. Деновиве се појавија многу фотографии со редици пензионери пред банките, како чекаат ред да си ги подигнат месечните пензии во утринските часови, одреденото време кога тие можат да се движат надвор од своите домови, според новите мерки за спречување и заштита од корона вирусот.
Имаше многу негативни, па дури и крајно непристојни коментари за редиците пензионери, коишто стоеја еден до друг во непосредно растојание, спротивно од препораките на МЗ и СЗО.
Факт е дека добар дел од пензионерите не се послушни кога станува збор за прекршување на нивните секојдневни навики, рутински активности и слободно движење во одреден временски период од денот. Но, факт е и дека многу од нив живеат сами, и немаат никаква помош од страна.
Освен неколку доброволци, коишто по сопствена иницијатива се понудија да им помогнат на повозрасните во текот на кризнава состојба, во форма на потребни набавки, проверки и достапност во секое време доколку нешто им треба, од надлежните институции досега нема некоја видлива акција за логистичка помош кон оваа група граѓани. Не дека мерките се погрешни, тие се повеќе од потребни за да се воведе ред и да се заштитат на најдобар можен начин сите граѓани, а највеќе – најризичните. Но, дали е добро смислена сатницата? Дали со оваа сатница не се прави уште повеќе штета, бидејќи сите во исто време се на исто место, било да е пред банка, пред супермаркет или слично? Дали со оваа мерка ризикот е двосмерен? Кон највозрасните, и последователно, кон другите.
Оваа мерка го има истиот ефект како и популистичката мерка за јавен превоз, со која пензионерите веќе со години користат бесплатен јавен превоз во одредени денови од неделата. Очигледно, бидејќи пензионерите сѐ уште се најблагодарните гласачи. И во тие денови, најголемата гужва ја прават токму тие, во раните утрински часови, кога во јавниот превоз најбројни се учениците и граѓаните што користат јавен превоз до работните места. Нели ќе беше подобро пензионерите да имаат бесплатен превоз секој ден? На тој начин, нивното присуство во јавниот превоз ќе биде разретчен, односно балансиран, бидејќи ќе им биде достапен секој ден во неделата.
Оваа промена во мерката би требало да се стави на дневен ред на некоја од седниците на Владата, во периодот откако ќе заврши вонредната состојба. Но, е тесно поврзана со сегашните мерки, со кои не само што не се заштитуваат пензионерите, туку и дополнително се загрозува нивното здравје. Би било добро да се продолжи за неколку часа наутро нивното слободно движење надвор од своите домови, за да може да се одбегне масовно собирање на едно место, а со тоа и да се одбегне дополнителниот ризик од евентуална инфекција.
Ако не како на слободни, државотворни граѓани, тогаш како избирачка машина, пензионерите памтат кој им се нашол, повеќе од се.
