Константин Плевнеш, професор на Универзитетот за аудиовизуелни уметности ЕСРА, за кој ЦИВИЛ Медиа пишуваше пред околу една година, продолжува со говорот на омразата на социјалните мрежи. Своевремено, тој замолкна пред јавната осуда на која наиде пред една година, откако вулгарно и со говор на омраза, тој се нафрли на неколку јавни личности, првенствено насочувајќи ја својата неразумна омраза кон проф. Катерина Колозова.
Всушност, она што изминативе два дена се случува не е само говор на омраза туку и отворени закани кон проф. Катерина Колозова, нејзиното семејство и пријатели.
ЦИВИЛ Медиа стапи во контакт со Колозова која нѐ информираше дека веќе е поднесена пријава до Јавното обвинителство, но и дека размислува за приватна граѓанска тужба поради клеветите кои Плевнеш ги упатува на нејзина адреса веќе подолг период.
Во разговорот, таа напомена дека не е толку револтирана од нападот кон неа, туку од нападите кон нејзини пријатели само затоа што, ете, ја познаваат и се дружат со неа. Во целата голгота која трае од вчера попладне, Плевнеш успеал да напише околу педесетина коментари и пораки од кои дел се однесуваат и на малолетни деца.
„Да се дрзнеш да пишуваш на објава за 4 годишно девојче, да се закануваш и да употребуваш погрдни зборови е навистна страшно“, вели Колозова која е крајно згрозена и револтирана од постапките на Плевнеш.
Стапивме во контакт и со пријателите на Колозова, брачен пар кој останува анонимен за јавноста.
Тие велат дека откако започнале навредите најнапред се обиделе на мирен начин да ја ублажат ситуацијата. Откако увиделе дека обидите се безуспешни, решиле да го игнорираат, но дури тогаш ситуацијата ескалирала. Плевнеш започнал да им ѕвони во 5 часот наутро да им се заканува и да ги вознемирува.
„Тогаш одлучивме да го пријавиме во полиција. Поднесовме пријава до Јавното обвинителство и го пријавивме во МВР, дадовме изјави и нѐ известија дека во текот на утрешниот ден ќе го повикаат на информативен разговор“, велат пријателите на Колозова.
ЦИВИЛ како организација за човекови права најостро го осудува ваквото однесување на Констанитн Плевнеш и ги повикува институциите сериозно да ја сфатат ситуацијата и да реагираат навреме. Особено затоа што ова не е прв пат оваа личност да се служи со говор на омраза и закани.
Пред година дена кога ЦИВИЛ Медиа пишуваше за заканите и говорот на омразата кои Плевнеш ги упатуваше кон професорката Катерина Колозова и професорот Љубомир Фрчковски, тој упати закани, вулгарности и говор на омразата и кон Организацијата.
ЦИВИЛ порачува: Нема оправдување за ваквите постапки. На потег се институциите. Неказнивоста мора да престане веднаш!
Маја Ивановска
