На Парадата на гордоста што ќе се оддржи на 29 јуни во Скопје ќе ѝ биде спротивставена контра-парада со манипулативен, верски слоган „Сведоштво за семејството“ во организација на иницијатива со недоволно транспарентно потекло и структура, наречена „Сојуз за живот“. И додека ЛГБТИ заедницата и сите нејзини поддржувачи ќе ја одбележуваат 50-годишнината од првите демонстрации во Њујорк, познати како Бунтот од Стоунвол, како пресвртна точка за создавање на движењето за права на ЛГБТИ заедиците ширум светот, на истиот датум, со поддршка на Брегалничката епархија ќе се промовираат „вистинските традиционални вредности на семејството“.
Целта на овој настан, според јавните повици, е да се прикаже вистината за тоа што е брак, семејство и пол и како придонесуваат тие за животот, а против идејата за родова рамноправност, под изговор дека тоа претставува „промоција на неприродното семејство“. Овие пораки се налик на практиките на „иницијативите“ од недоамнешното минато, кога на секоја прогресивна идеја и протест, режимот на Груевски му спротивставуваше контра-протест.
Иако во соопштението на иницијаторите на контра-парадата е наведено дека се повикани сите верски заедници и дека се здружени во „Сојуз за живот“, па наведени се МПЦ-ОА, ИВЗ, Римокатоличката црква, Евангелско – методистичка црква и Евангелска црква, останува отворено прашањето дали сите овие верски заедници навистина им одговориле позитивно на нивниот повик.
Промо видеото што го придружува овој повик ги злоупотребува и децата, а притоа е и крајно манипулативен, поигрувајќи со емоциите на луѓето, со тоа што се повикува на категориите поврзани со „вистината за животодавното разбирање за тоа што е брак, семејство, род, пол, вера, благослов, смисла, сопруг, сопруга, деца, внуци, баба, дедо, радост, живот…“
Се обидовме телефонски да контактираме со организаторите, но не наидовме на одговор. Очигледно, се во комуникација со Господ, примајќи ги последните инструкции за тоа коа најдобро да ги промовираат семејните вредности во духот на христијанството, па и други вери…
Останува да се надеваме дека Господ ќе им укаже дека сите се еднакви во негови очи, со исти права и можности, самостојно и слободно да се борат за своето право да бидат тоа што се по пол, род и сексуална ориентација.
Б. Ј./ЦИВИЛ
