Градоначалникот на Општина Радовиш, Герасим Конзулов, одговорајќи на прашањата на ЦИВИЛ Медиа, истакна дека справувањето со пандемијата од Ковид-19 е примарна цел на државата, но и општините. Конзулов даде оценка и на политичката состојба постизборно, како и подготвеноста на локалната самоуправа за евроинтеграциите.
ЦИВИЛ: Која е Вашата оценка за политичките состојби и процеси по предвремените парламентарни избори кои се одржаа во јули?
Конзулов: Беше битно да покажеме дека можеме да организираме демократски избори и тоа се рефлектира во оценката на ОБСЕ/ОДИХР. Мислам дека владеачката коалиција има јасна агенда со акцент на приближувањето до ЕУ и справување со економските последици од кризата со пандемијата. Успеавме да го задржиме континуитетот во надворешната политика кој беше доведен под знак прашање судејќи по пораките кои ги пласираа опозиционите партии. Тоа не е мала работа и јас сум оптимист дека позитивните трендови ќе продолжат, секако останува да се справиме со пандемијата на Ковид-19 како примарна работа.
ЦИВИЛ: До локалните избори има околу една година. Кои се Вашите прогнози?
Конзулов: Мојата оценка е дека луѓето ги препознаа позитивните трендови и тоа се покажа и во изборните резултати во Општината. Решивме дел од пробемите кои се провлекуваа со години, вложивме доста во уличната и патна инфраструктура. Клучно е тоа што граѓаните препознаваат дека локалната власт работи неселективно и во нивни интерес. Очекувам победа на СДСМ и на следните локални избори.
ЦИВИЛ: Како локалната самоуправа во вашата општина се подготвува за интеграција во ЕУ?
Конзулов: Првично фокустот ни беше во решавање на затекнатите проблеми кои беа бројни и од различен карактер. За кратко време успеавме да ја зголемиме ефикасноста во работата на општинската администрација. Од затекнати 2.251 нерешен предмет за легализација успеавме за само една година да решиме 1.402 и да изготвиме бројна техничка документација која недостасуваше, а е основа за аплицирање на европските проекти.
Некои се веќе завршени, дел се во реализација. Понатаму, ги вклучивме и невладините организации во општинските проекти и генерално ја отворивме Општината за граѓаните. Мислам дека комуникацијата локална власт – граѓанин е подигната на повисоко ниво. Секако останува уште многу работа, имаме доста слабости и простор за подобрување, но разликата е препознатлива и граѓаните тоа го гледаат. Наша обврска е да продолжиме да се рефомираме.
обработка на текст: Дијана Тахири