При денешната посета на фабриката „Дура Аутомотив Системс“, лоцирана во ТИРЗ 2 зоната, премиерот Димитар Ковачевски истакна дека ова е одлична можност да се види како изгледа примената на законското решение „Недела неработен ден“.
„Вработените на оваа компанија, која заради сложениот производствен процес мора да работи и во недела, добиваат дополнителни 50% од основната дневница. Со тоа просечната плата на оние вработени кои работат во недела во оваа компанија порасна“, рече премиерот Ковачевски.
Ковачевски, заедно со менаџментот на компанијата, министерската за труд и социјална политика Јована Тренчевска, директорите на ТИРЗ Јован Деспотовски и на Државен инспекторат за труд, Весна Томовска, ја искористија посетата и како можност за разговор со дел од работниците кои изразија задоволство од новиот закон.
„Трудот на работниците мора соодветно да се вреднува и почитува. Овој закон има многу позитивен ефект врз економијата, тој ги стимулира работниците и позитивно влијае на нивната продуктивност што е во интерес и на самите компании“, истакна Ковачевски.
Според него, законот за недела неработен ден ќе даде одлични резултати во зголемување на продуктивноста на компаниите и унапредување на стопанството. Ковачевски ја искористи приликата би да им честита на раководството на „Дура“, кои покрај двете фабрики, планираат и нова трета инвестиција во фабрика, инвестиција од над 20 милиони евра.
„Висината на инвестицијата во двете фабрики каде има 680 вработени е речиси 70 милиони евра. Она што е важно е дека просечната нето-плата во оваа компанија е над 600 евра и истата има тенденција за натамошен раст. Клучот за успешна стратегија во делот на странските инвестиции е обезбедување одржливост и развој на инвестициите, но и натпросечни плати со што се подобрува квалитетот на животот и примањата на граѓаните“, посочи Ковачевски.
Премиерот посака успешна работа за компанијата која има над 100 годишна историја во автомобилската индустрија.
Ц.Д