Премиерот Димитар Ковачевски во интервју за Сител телевизија кажа дека на вториот состанок на Европската политичка заедница во Молдавија биле сумирани резултатите по заклучоците од првиот состанок кој се одржа во Прага.
-Ние сме позитивен пример на спроведување на она што се договоривме, за една година ние имаме зголемено производство на обновливи извори на енергија, за една година имаме над 200 мегавати обновливи извори на енергија, за една година го зголемивме капацитетот на постојниот гасовод со Бугарија при што овозможивме либерализација на пазарот и ја намаливме зависноста на руски гас. Веќе направивме закуп на количини на ЛНГ гас во новиот ЛНГ терминал во Александрополи и подготвена е документацијата за изградба на нов гасовод, односно интерконтектор со Грција и веќе се подготвува документација за продолжување на тој интерконектор кон Србија и кон централно европските држави. Со тоа бевме истакнати како пример кој ја спроведува зелената агенда меѓутоа и стратешките процеси на поврзување, кажа Ковачевски.
Тој додаде дека се зборувало и за продолжување на процесот на поврзување на регионот и цела Европа во делот на снабдувањето со електрична енергија, производството на електрична енергија и од обновливи извори на енергија меѓутоа и со производство на нови капацитети за производство на електрична енергија на гас и за телекомуникациско поврзување.
-Се договоривме во делот на продолжување на активностите за изградба на електро енергетската мрежа и во нашиот регион каде што ние сме практично централната земја, беше поздравена изградбата на коридорот 8 бидејќи е тој веќе дел од трансевропските коридори од страна на сите држави, инвестицијата која ја правиме, која кај нас опозицијата изнесе низа на лаги, шпекулации се со цел да бидат против, меѓутоа тоа е проект кој ќе биде направен и кој и потребен и на Европа со оглед на тоа да ги поврзува пристаништата од Бургас преку Скопје, до Драч и до Италија, потенцира Ковачевски.
