ЈАНУАРИ го одбележаа ратификувањето на Преспанскиот договор во Собранието на Република Северна Македонија, протестите против промената на името, потпишувањето на Законот за употреба на јазиците од страна на претседателот на Собранието, Талат Џафери, како и изгласувањето на Преспанскиот договор во грчкиот Парламент.
Во ФЕВРУАРИ од позначајните настани се издвојуваат потпишувањето на протоколот за прием на земјата во НАТО од страна на 29 земји членки на Алијансата, распишувањето на претседателските избори, почетокот од имплементацијата на Преспанскиот договор, првата седница на новата Државна комисија за спречување на корупција и судир на интереси.
Посетата на Филип Рикер на Северна Македонија, издавањето на меѓународна потерница за Груевски и Бошковски, обелоденувањето на тројцата кандидати за претседател на земјата, средбата Заев – Мицкоски зад затворени врати, приведувањето на Чавков, пресудите за крвавиот четврток, апсењето на Стевчо Јакимовски, намалувањето на затворската казна за Јанкуловска, постапките кои ги поведе ДКСК против неколку функционери вклучително и тогашниот претседател Иванов и поплавата во просториите на СЈО се дел од поважните настани во МАРТ.
Во АПРИЛ започна кампањата за претседателските избори, Алексис Ципрас ја посети Северна Македонија, ЦИВИЛ ја покрена иницијативата за прогласување на 12 април за ден на протестите, која ја поддржа и тогашниот кандидат за претседател, Стево Пендаровски, се одржа првиот круг од претседателските избори, ИВЗ ја следеа низа скандали, а претставници на Шарената револуција ги повикаа кандидатите Силјановска и Пендаровски #НаМегдан.
Вториот круг од претседателските избори, победата на Стево Пендаровски, укинувањето на куќниот притвор за Мијалков, посетата на папата во Скопје, доставувањето на иницијативата на ЦИВИЛ за укинување на привилегиите во Собранието, оставката на Павле Богоевски од пратеничката функција, бомбите на Ел Чека за ДУИ, седницата на Централниот одбор на СДСМ и најавувањето на „метлата“ на Заев се настаните кои го одбележаа МАЈ.
Во ЈУНИ Груевски од Будимпешта си даде оставка од пратеничката функција, Јанева даде одобрение за враќање на пасошот на Камчев, државниот секретар во МИОА, Јахија, беше уапсен како осомничен за земање поткуп, се одбележа годишнината од потпишувањето на Преспанскиот договор, се одложи казната за Јанкуловска, се спроведе реконструкцијата на Владата и се одржа првата Парада на гордоста во Скопје.
ЈУЛИ го одбележаа новиот Закон за прекинување на бременоста, штрајкот со глад на Миле Јанакиески, неиздавањето дозвола за рудникот Иловица, отфрлањето на пријавата против Канчевска Милеска, ослободувањата од обвиненијата за Латас и браќата, Садула Дураку на функцијата вицепремиер, бомбите за Рашковски, апликацијата „Мој ДДВ“, апсењето на Бојан Јовановски – Боки 13 и обелоденувањето на случајот „Рекет“ во јавноста.
Спроведувањето на Сеад Кочан во Идризово, казната од 7 години за дедото на Тамара, ДКСК поведе постапка против градоначалникот на Сарај, објавувањето на видеа за „Рекет“ во Ла Верита, апсењето на Катица Јанева, стапувањето на функција на новата министерка за економија Ангеловска се дел од настаните кои го одбележаа АВГУСТ.
СЕПТЕМВРИ започна со штрајкот на СОНК, потоа следуваа: застарувањето на случајот Ликвидација, посетата на Венецијанската комисија, напади врз здравствени работници во повеќе здравствени установи во земјата кои предизвикаа штрајк, разрешувањето на Јово Вангеловски од Судскиот совет, потврдувањето на затворските казни за седуммината осомничени за обид за убиство на Зијадин Села, собраниската иницијатива за една изборна единица, куќниот притвор за Зоран Милески – Кичеец и конференцијата на ЦИВИЛ „Перспективите на македонските избори“.
Во ОКТОМВРИ Независниот синдикат на полицијата излезе на протести, Груевски доби право на глас во Унгарија, Македонија остана без датум за преговори за влез во Европската Унија, на лидерската средба кај Пендаровски лидерите на парламентарните партии се договорија за предвремени парламентарни избори на 12 април 2020 година и Метју Палмер беше во посета на Скопје.
ДКСК со кривична пријава за градоначалникот на Струга, Рамиз Мерко, Јанева од Шутка побара апанажа, Сасоли ја посети Македонија, МОН и СОНК постигнаа договор за повисоки плати, Груевски беше ослободен од обвиненијата за „Траекторија“, Зекир Рамчиловиќ е нов потпретседател на Собранието, Камчев со кривична пријава за обвинителките Катица Јанева и Лиле Стефанова, Јанева доби куќен притвор, се промовираше платформата „Отворени финансии“ и Албанија беше погодена од катастрофален земјотрес во НОЕМВРИ.
Од настаните кои го одбележаа ДЕКЕМВРИ се издвојуваат започнувањето на судскиот процес за „Рекет“, првата исплата од „Мој ДДВ“, протестите за чист воздух, изгласувањето на новиот државен ревизор во Собранието, маршот на сексуалните работнички, исказот на Ременски за случајот „Рекет“, едностраното раскинување на договорот за Иловица, лидерската средба Заев – Мицкоски и конечното потпишување на колективен договор во културата.
