Меѓу порталите кои известија за конгресот на ВМРО-ДПМНЕ и изнесените ставови на Мицкоски пред делегатите беше и „Курир“, кој на 13 декември 2021 објави наслов „Говорот на Мицкоски привлече големо внимание: Реторика која обединува, без напад кон ривалите, но со точни решенија за проблемите“.
„Говорот на Мицкоски по неговиот реизбор за лидерската позиција, привлече големо внимание. Беше различен од досега и посветен исклучиво на партиските цели, со повици за обединување. Во говорот немаше ниту критика кон опонентите, односно актуелната власт.“, тврди Курир.
Но, ваквата оценка не ја поминува елементарната проверка на факти. Како што видовме претходно, Мицкоски во својот говор го критикува и омаловажува политичкиот опонент користејќи потценувачка реторика и дезинформации дека бил „пазарџија од Горни Милановац“.
Но, и во делови од говорот на Мицкоски што ги пренесува самиот „Курир“ има експлицитни критики кон актуелната власт и нејзините политики. На пример, во делот кога Мицкоски говори:
„Сметам дека како општество премногу долго сме во истото мочуриште во кои нè доведоа неодговорни и лукративни политики, а сериозен проблем претставува ударот по самодовербата на луѓето и нивното чувство дека сите се исти и многу малку може да се смени.“
Или кога Мицкоски експлицитно ја критикува корупцијата во државата и „хибридниот режим“:
„Нема скала на релевантна институција која мери корупција каде државата не е вбројана за една од најкорумпираните во Европа, а во светски рамки сме во друштво на некои хибридни државни творби од Африка. А меѓу другото оценката е дека и тука владее хибриден режим кој секоја година повеќе заглавува во криминалот и корупцијата која не се случува само меѓу највисоките структури туку е пренесена на најниските можни рамништа.“
Оваа критика на Мицкоски дека „тука владее хибриден режим кој секоја година повеќе заглавува во криминалот и корупцијата“ не е објективно претставување на оценките од меѓународните индекси, туку е спин и манипулација.
За ова пишуваа проверувачите на факти од Вистиномер минатата година во текстот „Контраспин: Подобро „хибриден режим“ отколку „заробена држава““. Оценките на многу светски индекси не се задоволувачки, но се подобри од оние со кои бевме оценувани во минатото.
Накусо, Курир останува со кратки нозе кога тврди дека Мицкоски на конгресот „немаше ниту критика кон опонентите, односно актуелната власт“. Истото важи и за критиките на Мицкоски обременети со навредлива реторика и манипулации со фактите.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски
