Повеќе портали објавија информации за „сериозна студија која што ја објави „Дискавери““, како дел од изјава на наш лекар, кој упати апел за затворање на школите и преминување на онлајн-настава поради опасност од „омикрон“ сојот.
Но, да видиме што точно кажа лекарот во прилогот на ТВ Сител од 20.12.2021 со наслов: „Царовска: Епидемиолошката состојба во училиштата е стабилна – Мехмедовиќ апелира на онлајн настава поради ковид и сезонски грип“.
„Има една сериозна студија, која што ја објави Дискавери – осигурањето во Јужна Африка, според која што доколку хоспитализацијата кај повозрасните е намалена за негдека до 30%, кога е во прашање омикрон сојот, кај децата таа хоспитализација, збориме за децата под 18-годишна возраст, школска возраст, е зголемена за 20%, тоа е сериозна бројка која што ни индицира дека треба сериозно да размислуваме за тоа да ги заштитиме и помладите, а не да ги препуштиме толку лесно на вирусот и на болеста, и да сметаме дека лесно ќе поминат на таа фаза на создавање имунитет и прележување на болеста. Затоа сметам дека он-лајн наставата е едно од посоодветните решенија, барем во овој период додека имаме зголемена циркулација на респираторни вируси.“
Оваа изјава не е соодветно пренесена ни во прилогот на Сител, ниту од порталите кои спомнуваат само „Дискавери“, без да кажат дека станува збор за осигурителна компанија „Дискавери хелт“, што ги наведува читателите на погрешни заклучоци дека се работи за ТВ каналот „Дискавери“.
За резултатите од споменатата студија извести и „Ројтерс“ на 14 декември, напоменувајќи дека наодите не се конечни, туку прелиминарни. По известувањето за зголемениот ризик од 20% за хоспитализација кај децата (иако има многу ниска апсолутна инциденца кај децата), има предупредување дека станува збор за „рани податоци“, а подоцна и тврдење дека „научниците од Јужна Африка рекоа дека не можат да потврдат врска помеѓу Омикрон и зголемените приеми на деца“.
И експертските реакции објавени на 14 декември на „Science media Center“, укажуваат дека не треба да се извлекуваат дефинитивни заклучоци за ризикот за децата, поради тоа што станува за рани податоци, и некомплетни и делумни податоци. Еден од експертите укажува дека и за претходните варијанти имало тврдења дека децата ќе бидат позасегнати, што подоцна се покажало како неточно, затоа што тврдењата биле засновани на рани и делумни податоци.
И СЗО на 17 декември 2021 укажа дека се уште има ограничени податоци за клиничката сериозност на Омикрон, и дека се потребни повеќе податоци за да се дојде до разбирање.
Затоа, додека науката не дојде до проверливи сознанија, најдобро е да ги почитуваме препораките на СЗО за заштита на себеси и на другите, и да се воздржиме од ширење на дезинформации или непроверени информации, кои можат да имаат сериозни штетни последици.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски