Фестивалот на слободата во организација на ЦИВИЛ, по повод Меѓународниот ден на човековите права вчера ја организираше панел дискусија на тема „Општеството во пандемија, изведувачките уметности на раб на опстанокот“, во хотел Парк Резиденс.
На панелот говорници беа Јасмина Никуљска од Министерство за култура, Оливер Белопета, Скопје џез фестивал, Ирена Стеријоска, режисерка, Никола Наумоски од Град Скопје и Трајко Симоновски, музичар, Здружение на музичари „Музика сега“.
„Короната зададе огромен удар врз културата, но прашањето дали културата е мртва одговорот е децидно – не. Се соочивме со многу проблеми еден од најглавните беше пандемијата и корона во културата. Затекнавме нереализирани проекти, од март беа застанати, за среќа можам да кажам и покрај промената на Владата и министрите самите уметници и националните установи го искористија многу добро летото и отворениот простор и оргазнизираа многу настани и покрија дел од програмата“, истакна Јасмина Никуљска од Министерство за култура.
Таа додаде дека изминатото лето со големи вложувања беа организирани многу настани, како Охридско лето, Струшки вечери на поезијата, Синедејс, Скопскиот џез фестивал, со огромни напори оствари дел од програмата, да собере публика.
Оливер Белопета, Скопје џез фестивал истакна дека останале упорни во најтешкиот период во октомври и ноември да успеат да го организираат фестивалот.
„Не се следи доволно состојбата на овој план во Европа, малку знаеме какви се регулативите во Европа и какви беа летоска, од тој аспект можам да кажам дека кај нас летово имавме најлиберални мерки за културата, во споредба со цела Европа, а сега во Европа културата е затврорена. Имаме најлиберални мерки кои немам намера да ги критикувам, мислам дека од овој аспект од донесување на регулативите за летото и настани во затворени простори, одигра значајна улога да културата сепак максимално остане отворена“, истакна Белопета.
„Јасно е дека во однос на целата жива уметност, не трпиме многу удари од аспект на креативност, не постои тежок период кој не се преживеал, па да се збори за истиот, не мислам дека сме загрозени на долг рок. Јас очекував повеќе активности и вклучување од институциите“, изјави Ирена Стеријовска.
Таа додаде дека институциите биле заспани и дека требало да организираат некакви иницијативи.
„Периодов со корона кризата беше катастрофален, бидејќи јас имам сериозна музичка кариера, но бев доведен во ситуација во последните 6-7 месеци да бидам без никакви примања, сега веќе дојде „нож под грло“, немавме друг избор туку да поправиме една грешка, а тоа е да организираме здружение кое ќе се погрижи за правата на музичарите“, истакна Трајко Симоновски.
Ние како здружение, вели Симоновски, сме многу задоволни за колку кратко време стигнавме да разговоараме со институции, како на пример со претседателот, тој се потруди да ни помогне, но тоа е отприлика тоа, разговаравме со Алаѓозовки, а средбата со Битиќи не се оствари.
Никола Наумоски од Град Скопје истакна дека целата криза со корона била тешка, Владата правела промени за да може да пренамени средства за културни институции.
„Култура во време на корона не ги раздели парите на тие кои учествуваат, туку на тие кои се невработени, музичарите солидарно свиреа и изведуваа за своите членови. И така успеавме да организираме преку 50 настани во осум скопски општини, исплативме 200 луѓе во првите моменти на короната, ние успеавме на овие луѓе да им најдеме решение“, истакна Наумоски.
