Косовскиот премиер Албин Курти во интервју за швајцарскиот весник Tages-Anzeiger изјави дека Србија се обидува да создаде сесловенска хегемонија на Балканот, пренесува Kallxo.com.
Според него, Србија се обидува да го врати влијанието во Босна, Косово и Црна Гора.
„Србија сака Српската Република во Босна, Црна Гора и северот на Косово да ја претвори во сфера на влијание. Исто како што Русија се однесува со Белорусија и Украина. Нашиот проблем е што нашите западни партнери веруваат дека Србија се води само од опортунизам, дека го чека крајот на ерата на Путин и потоа јасно ќе се ориентира кон Европа. Ова е наивно“, рече Курти.
Новинарот Стефан Израел го праша Курти и за изјавите на шефот за надворешна политика на ЕУ, Жозеп Борел, кој го обвини дека е главната пречка за блокирање на преговорите за нормализација со Србија и зошто не ги спроведува договорите како оние за автономија на Заедницата на српски општини.
Курти нагласи дека Србија инсистира на Заедницата на општините со мнозинско српско население да го направи Косово, како Босна, држава во држава.
Косовскиот премиер нагласи дека Србија инсистира на Заедницата на општините со мнозинско српско население да го направи Косово, како Босна, држава во држава.
„Во последните десет години потпишавме 33 договори со Србија. Речиси ништо не е спроведено. Некои од овие договори би биле и во наш интерес, но Белград секогаш инсистира на автономија на општините со српско мнозинство. Зошто мислиш дека е тоа? Србија сака Косово, како Босна, да има држава во држава со Република Српска, односно да стане нефункционално. Му реков на Вучиќ дека ако навистина сака да направи нешто за српското малцинство, треба да го признава Косово. Тој не може да каже дека Косово е „лажна држава“ и во исто време да бара општинска автономија во рамките на оваа држава. Тоа е како да нарачате чај без шолја. Ние не сме глупави“, додаде Курти.
Според косовскиот премиер, Вучиќ повеќе го чека враќањето на Доналд Трамп во САД отколку крајот на војната во Украина.
„Александар Вучиќ повеќе го чека враќањето на Доналд Трамп во Вашингтон отколку крајот на војната во Украина. 80 отсто од населението има позитивно мислење за Владимир Путин. Србија се гледа себеси како дел од сесловенската, православна сфера надвор од Европа“, истакна Курти.
Според него, Белград не ги одобрил санкциите против Москва и добива најевтин гас од Русија. Тој додаде дека за Белград приоритет имаат односите со Русија и со Кина и тоа треба да има цена.
Н. А.
