Кое било решение (за спорот за името) што ќе го изнајдат Македонија и Грција и кое ќе биде поткрепено во македонскиот Устав, ние (Руската Федерација) најверојатно ќе го прифатиме, изјави шефот на руската дипломатија Сергеј Лавров, одговарајќи на прашање на грчки новинар на годишната прес-конференција на министерот за надворешни работи на Русија, што се одржува денеска.
Лавров истакна дека спорот за името меѓу Скопје и Атина долго време бил во „полузаспана ситуација“ и дека заживеал откако САД одлучиле Македонија да влезе во НАТО.
Шефот на руската дипломатија потсети дека Грција е веќе членка на НАТО и оти не и е неопходно да прави отстапки околу ова прашање, туку дека тоа треба да го стори Македонија, која се надева дека ќе влезе во НАТО.
„Во однос на ревитализирањето на напорите за решавање на проблемот за официјалното име на Македонија, овие напори беа долго во полузаспана состојба и се интензивираа дури тогаш, кога САД одлучија, дека Македонија треба да биде во НАТО…Суштината на она што се случува се надевам дека е разбирлива за сите, тука не станува збор за земање предвид на заедничките и специфичните карактеристики на два блиски народа, туку за тоа дека една од овие земји нужно мора да стане членка на НАТО“, рече Лавров.
На традиционалната прес-конференција, која трае неколку часа Лавров прави преглед на централните теми од минатата и на оние кои претстојат во новата година и одговара на новинарски прашања и за други теми од руската надворешна политика.
извор: МЕТА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.
