Централниот одбор на Либерално-демократската партија (ЛДП) синоќа реши на претстојните локални избори на 15 октомври, да биде дел од „победничката коалиција со СДСМ“, која според либерал-демократите „гарантира враќање на демократијата на локално ниво, расчистување со криминалното рабтоење и конечно, посветување на реалните локални проблеми на граѓаните“.
Членовите на Централниот одбор на ЛДП, на синоќешната седница го исклучија „од партијата и од сите партиски тела и органи“, градоначалникот на Општина Центар и експретседател на ЛДП (во периодот од 2011 до 2015), Андреј Жерновски, поради неговиот трансфер во СДСМ.
Жерновски се откажа од независната кандидатура за нов градоначалнички мандат, поради учество во централната власт и премина во редовите на СДСМ. Во одделни медиуми беше објавено дека поради неговото искуство со тендери и јавни набавки, лидерот на неговата нова партија, Зоран Заев, ќе му ја понуди раководната функција во Бирото за јавни набавки!
„Овој мандат нема да го заборавам, беше сè, само не обичен, исполнет со уцени, закани и турбуленции и разговаравме да земам учество во централната власт и да помогнам со моето искуство“, изјави Жерновски, кој образложи и дека „веќе подолго време нема контакт со довчерашните сопартијци“.
Иако членовите на ЦО на ЛДП го прифатија договорот за коалиционен настап на локалните избори со СДСМ, и на својот некогашен лидер му посака „среќа и успех во натамошната работа“, сепак, на партнерот во „победничката коалиција“ СДСМ, му посакаа со Жерновски „да не им се повтори Стевчо Јакимовски“.
