„Левица“ и нејзините членови продолжуваат со напади врз Џабир Дерала, претседателот на ЦИВИЛ, но врз организацијата и нејзините членови во целост, како и кон сите прогресивни граѓанки и граѓани на нашата земја.
Најновите напади се објавени во текстот под наслов „Двојните аршини на западните пропагандисти“, на 5 мај 2021 година, потпишан од Реџеп Исмаил (Хактан) Президиум на „Левица“. Оваа партија, преку својот функционер, продолжува со манипулации, клевети, навреди и смртни закани против Џабир Дерала и ЦИВИЛ.
Веднаш по објавата на текстот на неговиот сопартиец, шефот на „Левица“, Димитар Апасиев, познат по секојдневните објави со вулгарности, закани и повици на екстремно насилство, го поддржа на социјалните мрежи, каде што го издвојува делот од текстот во кој има директна смртна закана со линч, а кој гласи:
АнтиCIVIL колумна на другарот Реџеп Исмаил: „Полека не се сили, оти утре и Заев и САД ќе соберат парталите и ќе си заминат, а ти, навлекувајќи ја омразата која они ја создале, ќе останеш ачик среде бесни ѕверови – кои, претходно, додека биле врзани и мали, си ги малтретирал со дренова прачка“!
Повеќе од јасна е намерата на оваа црна пропаганда насочена против една прогресивна граѓанска организација за човекови права која постои 22 години. Целта им е да се омаловажат активностите, како и извештаите и анализите на организацијата која ужива огромен углед и доверба, како од голем број граѓанки и граѓани во земјава, така и на меѓународно ниво.
Уште повеќе од тоа, јасно е дека Левица е дел од структурите во земјава кои се обидуваат, не само да омаловажуваат и навредуваат, туку и да ги заплашат граѓанките и граѓаните. Уште еднаш, оваа партија се открива како еден од најдеструктивните елементи во политичката сцена, кои својата позиција ја злоупотребуваат за редовно јавно изразување на своите радикални, десничарски, антидемократски и ултранационалистички ставови и програми.
Јасни се партиските ставови на Левица, кои се само еден мал дел од поширока политички и пропагандни структури чии напади се секојдневни и траат со години и се насочени против сите што не мислат како нив. Нивното оружје се вулгарностите, лагите и смртните закани. Политичкото насилство е високо на листата на нивните методи на дејствување.
ЦИВИЛ уште еднаш апелира до институциите и независните регулаторни тела конечно да преземат законски чекори за да се спречи и санкционира ваквото однесување во јавните комуникации и во медиумите.
Воедно, ЦИВИЛ ја повикува целокупната јавност решително да ги отфрлат и остро да ги осудат лагите, навредите и повиците за ликвидација на неистомислениците со кои се служат одделни политички партии и нивните челници.
ЦИВИЛ
Прилог: Скриншот од објавата на партискиот шеф на Левица, Димитар Апасиев
