Прилепскиот пратеник од СДСМ, Хари Локвенец го обвинува ВМРО-ДПМНЕ за вознемирување на неговото семејство последниве десетина дена. Тој е убеден дека по порачка од оваа партија, се испратени лица со криминално досие да ги вознемируваат неговите деца во време кога тој и сопругата биле на пат во Скопје.
Локвенец е убеден и дека кршењето на стаклата од излогот на неговиот дуќан, во центарот на градот, за време на протестите под мотото „За заедничка Македонија“ е сценарио на ВМРО-ДПМНЕ. Според Локвенец, на овој начин, ВМРО-ДПМНЕ демонстрира чисто лицемерие во обид да создава атмосфера на страв.
„Петнаестмина, голем дел од нив со криминално досие, се обидуваат на недостоен начин да го исплашат моето семејство, во време кога јас и сопругата сме во Скопје, што лесно било да се провери, зашто автомобилот не го виделе на паркингот пред зградата. Тие знаеја кога сум дома, ако им беше целта лично да ми достават што и да било“, изјави Локвенец.
Тој вели дека досега доволно го покажал својот патриотизам.
„Недозволиво е недостојни луѓе да го мерат и проценуваат мојот патриотизам. Јас немам гласано за амнестија за ‘хашките случаи’. Убеден сум дека ова не е начинот како да стигнеме до заедничка Македонија. Дали ова значи дека сите кои несвесно, заведени учествуваат во протестите, се согласуваат да ги води ваков профил луѓе, криминалци кои се закануваат на малолетни деца“, изјави Локвенец.
М. Талеска
