Светскиот ден за борба против астмата во Македонија и оваа година ќе се одбележи со недостиг на лекови на позитивната листа.
Според податоците од минатата година од Клиниката за пулмологија во Македонија од астма се заболени 80 000 до 100 000 лица. Се верува дека оваа бројка е зголемена на 170 000 заболени лица вклучувајќи ги и оние со дијагноза ХОББ (хронична опструктивна белодробна болест).
Инаку, астмата е хронична опструктивна болест на дишните патишта, се одликува со нарушен проток на воздух и зголемена реактивност на дишните патишта кон иританси од надворешната средина- тригери. Причините не се докрај разјаснети, но познато е дека влијаат генетската предиспозиција во комбинација со факторите од животната средина- изложеност на алергени (мувла, полен, алергени во храна), иританси (прашина, чад од цигари,хемиски иританси, загаден воздух), физички напор, лекови, ладен воздух, емоции. Оттука како причина се наметнува се позагадениот воздух, особено во урбаните средини. Превентивно би можело да се делува со подигнување на еколошката свест.
Пациентите постојано се соочуваат со недостиг на лекарства за ова заболување, кои веќе на вториот ден од месецот ги нема на позитивната листа на лекови, па граѓаните ги купуваат по цена која достигнува и до 50 евра од спреј.
И покрај постојаното зголемување на пациенти со респираторни проблеми, Агенцијата за лекови и Министерството за здравство, овие лекарства ги водат како лекови за ретки болести, а бројот на увезени месечни количини не соодветствува со потребите на граѓаните.
Во десетината аптеки кои ЦИВИЛ Медиа ги посети изминатиот месец во истиот момент кога ќе разберат за каков лек се работи вработените веднаш креваат раменици и речиси секогаш велат дека воопшто не го добиваат. Онаму каде што го има, пак, постои листа на резервирани лекови кои ги подигаат редовни пациенти.
ЦИВИЛ Медиа се обрати и до Агенцијата за лекови од каде негираа дека постои недостиг на лекарствата за астма и ХОББ, но до денеска не ни одговорија колкави количини од лековите се увезуваат и се наоѓаат на позитивната листа.
М. Ивановска
