Министерот за надворешни работи на Грција Никос Коѕијас на утрешната официјална еднодневна посета на Скопје, ќе се сретне со шефот на македонската дипломатија Никола Димитров, а по разговорите ќе има и заедничка изјава за медиумите. Според грчкото МНР, Коѕијас ќе биде примен и од претседателот Ѓорге Иванов, премиерот Зоран Заев, и заменик-премиерот, одговорен за односи со ЕУ, Бујар Османи, а ќе се сретне и со претставници на парламентарните партии.
И додека дел од аналитичарите во двете држави најавуваат дека ништо спектакуларно не треба да се очекува од посетата на Коѕијас, и дека и покрај реалноста на очекувањата за подобрување на односите и на меѓусебната доверба, што и беше најавено како главна цел на посетата, сепак, нема да има драстични промени во позициите на Атина и Скопје, околу долгогодишниот спор за името. Според одделни грчки медиуми, официјална Атина „нема да дозволи македонските власти да ја монополизираат конструктивноста на средбата, и од друга страна, ќе покаже дека с уште не се создале услови за брзо решавање на прашањето за името“.
Покрај официјалниот дел од средбата, организациите „Македонски манифест“ и „Светскиот македонски конгрес“ најавија дека утре, пред Министерството за надворешни работи, ќе го дочекаат гостинот од Грција, со протест и со транспаренти.
Организаторите соопштија дека на мирниот протест уште еднаш ќе ја потенцираат својата „црвена линија“ за името: „Сме биле, сме и ќе бидеме Македонци и Македонија! Името на државата е идентитетот на нацијата! Македонски манифест и Светскиот македонски конгрес бараат безусловен крај на разговорите за државното име Македонија и безусловно и итно продолжување на членството во Обединетите Нации под државното име Македонија!“
Вчера во Атина се одржа шестиот Состанок за мерките за градење на доверба меѓу Република Македонија и Република Грција, според договорот постигнат меѓу министрите за надворешни работи на двете земји во Скопје, на 24 јуни 2015, кога беа наведени 11 конкретни точки за градење на довербата. Според соопштението на македонското МНР, состанокот бил продолжение на пријателскиот и конструктивен дијалог на заемно договорените теми: проекти за меѓусебно поврзување во областите на транспортот и енергијата, полициска соработка, европски програми, култура, образование, цивилна заштита, јавна администрација, здравствена заштита, соработка меѓу дипломатските академии и иницијативи за деловна соработка.
За напредокот во процесот на спроведување на мерките за градење на доверба ќе се разговара и на утрешната средба меѓу Коѕијас и Димитров, а следниот состанок за мерките за градење на доверба меѓу Република Македонија и Република Грција, ќе се одржи во Скопје.
