„Цврсто стојам на ставот, за кој некои од новинарските здруженија ми замеруваат, дека владата не смее да биде моторот на реформите во медиумите. Мислам, самото е иронично да се каже – „владата да биде мотор на реформи во медиуми. Не смее!“, изјави Дамјан Манчевски, министерот за информатичко општество и администрација на денешната меѓународна конференција за „Е-општество“ на тема „Слобода и приватност“.
На конференцијата Манчевски истакна дека двигатели на промените треба да бидат новинарските работници, новинарските здруженија, самите медиуми.
„Нам како влада, единствена амбиција ни е да им обезбедиме простор, дебата и механизам. Ние сме алатка за спроведување на тоа што тие мислат дека треба да се направи. Ние сме тука за нив да ги слушнеме и сме спремни за било какви измени на било кој предлог текст“, истакна тој.
„Во делот на слободата на изразување и тука ќе го поврзам и делот со реформите во медиумската сфера започнавме еден процес во којшто сакавме најинклузивно и најтранспарентно да бидат вклучени сите заинтересирани страни, медиумските претставници, нивните здруженија, особено медиумите, невладините организации, здруженијата на новинари и буквално сите заинтересирани поединци. Во тој контекст ги изложивме промените на Законот за аудио и аудио визуелни медиумски услуги, ја водиме дебатата и ќе ја продолжиме се додека не го најдеме најдоброто можно решение“, вели Манчевски.
Во однос на моменталната состојба со медиумите и медиумскиот простор тој вели: „Јас имам мои лични ставови особено во делот на интернет порталите дека дел од проблемите коишто не доведоа до оваа ситуација во медиумската сфера е токму тоа дека одредени портали коишто пласираа одредени вести, никогаш не ги декларираа своите уредници. Ние не знаеме кој стои зад тие портали. Нивните сопственици се во некои оф-шор дестинации. А таквите вести беа преземани од мејнстрим медиумите во Македонија и беа пласирани како главни вести. За жал ние станавме многу познати во цел свет како извор на лажни вести. Моето објаснување за ова, повторно ќе кажам мојот личен став е дека ние живеевме во општество на лажни вести осум години. Младите во оваа земја се израснати во општество на лажни вести, тие не знаат за друго. За нив тоа е во ред“.
Маја Ивановска
Камера: Дехран Муратов
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
