„Опозицијата со ова што го прави, не пропушта прилика да го испразни Собранието од содржина и суштина. И пратеничките прашања се такви, а и овие бескрајни дискусии кои немаат никаква поента и се повторуваат“ изјави вицепремиерот за европски прашања, Бојан Маричиќ во „Вин-вин“ на Телма.
Тој додаде дека тие го повторуваат истиот говор цело време за да се купи време, да се наведе власта на непристојност и нервоза.
„Кога власта демонстрира мнозинство по некое прашање, а тоа уште првиот ден го покажавме со гласањето за дневен ред, нема поента сите 40 пратеници на ВМРО-ДПМНЕ да се пријават да зборуваат за еден министер“ рече Маричиќ.
Вицепремиерот истакна дека после две и пол години блокирање од страна на ВМРО-ДПМНЕ се поставува прашањето дали целосната блокада на Собранието е легитимна политичка стратегија.
„Дали тоа не ги одвраќа граѓаните активно да учествуваат во политичкиот живот и дали не ја убива желбата на граѓаните да следат, кога знаат дека 40 дискутанти ќе го кажат истото по истото прашање?“ запраша Маричиќ.
