Русија изврши масивен напад со беспилотни летала и ракети врз главниот град на Украина и други области, неколку дена по ненадејниот напад на Украина врз нејзините воздухопловни бази.
Пет лица беа убиени, а 80 повредени, соопштија украинските власти, при што беа лансирани крстосувачки ракети и стотици беспилотни летала, пренесе Би-Би-Си.
Нападите беа насочени кон главниот град Кијив и северниот град Чернигив, како и Луцк и Тернопил на северозапад.
Русија соопшти дека нападите биле одговор на „терористичките акти на режимот во Киев“, велејќи дека цел биле воени објекти.
Москва, исто така, објави дека соборила 174 украински беспилотни летала над делови од Русија и окупираниот Крим. Крстосувачките противбродски ракети „Нептун“, како што соопшти, биле пресретнати над Црното Море.
Нападот се случи откако Путин го предупреди американскиот претседател Доналд Трамп дека ќе одговори на неодамнешните напади на Украина во неколку руски региони.
Доцна во петокот, Трамп им рече на новинарите дека Украинците му дале „на Путин причина да влезе и да ги бомбардира до смрт синоќа“.
Портпаролот на Путин, Дмитриј Песков, ја опиша војната во Украина како „егзистенцијална“ за Русија, велејќи дека тоа е „прашање на нашите национални интереси, прашање на нашата безбедност“.
Москва ја обвини Украина за три бомбашки напади врз железници во западните руски региони Брјанск и Курск, во кои, според извештаите, загинаа седум лица, а повеќе од 100 беа повредени минатиот викенд. Киев не коментираше за тие напади.
Сепак, Украина соопшти дека минатата недела ги извршила своите најголеми напади со беспилотни летала со долг дострел врз најмалку 40 руски воени авиони во четири воени бази длабоко во Русија.
