Потпретседателот на ДУИ, Изет Меџити, кој е и дел од таканаречената „огнена група“, веќе подолго време јавно го изнесува незадоволството од начинот на кој работат министрите кои доаѓаат од ДУИ.
Тој вчера во интервју за „Клик пулс“ ги обелодени своите критики што ги имаат кон оваа власт. Меѓу другото, тој рече дека не е заинтересиран ниту да биде лидер на партијата, ниту да го замени Али Ахмети. Дека за оваа влада гласал само поради Али Ахмети и евроинтеграциите.
– Дваесет години сум во оваа партија и континуирано и носам победа на партијата во местото каде што сум, немам ли право да му кажам кога некој некаде ќе згреши? Оваа Влада е формирана пред две години и оттогаш ги искажувам моите критики за оваа извршна власт и јавно пред Собранието кажав дека ќе гласам за оваа Влада само поради Али Ахмети и поради европските интеграции. Во принцип, јас бев против, гласовите на терен се собрани со Али Ахмети и оваа извршна власт не се соочуваше со граѓаните, значи нема легитимитет кај граѓанините. Исто така, оваа извршна власт ги нема поминато филтрите на партиските органи, односно во генералниот совет, рече Меџити вчера во емисијата „Клик плус“ во ТВ 21.
Меџити, кој воедно е и пратеник во македонското Собрание го коментираше обидот на Алијанса за Албанците да влезе во Владата.
„Тие можат да ја внесат Алијансата за Албанците за да ја замолчат „Огнената група“, вака Изет Меџити ја гледа ситуацијата по информациите дека албанската опозициска партија може да стане дел од владината коалиција.
Меџити упати обвинувања до првиот заменик-премиер Артан Груби дека го елиминира наследството на ДУИ и одредени политички поединци
„Со правење нови работи, нови наследства, вицепремиерот Артан Груби го елиминира наследството на ДУИ и политичките личност“, изјави Меџити, додавајќи дека
„Груби со тоа што го прави, се обидува да елиминира наследство на ДУИ со тоа што политички ги елиминира политичките личности, внатре – столбовите на ДУИ, обидувајќи се да остави ново наследство“.
Изет Меџити во вторникот најави дека в сабота во 19 часот ќе одржат состанок со структурите на огранокот на ДУИ во Битола. Неколку часа подоцна, на социјалните мрежи се појави уште една објава, овој пат од министри од ДУИ, на која најавија средба во ограноците на партијата во Чегране и Гостивар под мотото „Заедно за ЕУ“ за истиот ден и во исто време.
За најавените средби на претставниците на ДУИ со партиските структури во гостиварско Чегране за в сабота во 19 часот, Меџити вели дека за нив не е одлучено на Генералниот Совет на партијата.
Коментирајќи ја вчерашната средба на министерот за економија Крешник Бектеши со други функционери од ДУИ во Битола, Меџити истакнува дека оваа посета, која доаѓа пред најавената посета на т.н. „Огнена група“ во овој град за в сабота во 19 часот, е недолична.
Расколот во ДУИ
Превирањата почнаа откако членови на ДУИ на 24 септември во отворено писмо обвинија дека во партијата речиси две години не постојат и не се формираат статутарните партиски тела и дека политичкото одлучување, според нив, станало индивидуално.
Незадоволната група од редовите на Демократската унија за интеграција (ДУИ) во декември претставија анализа и го повторија своето незадоволство од работењето на дел од министрите во Владата и побараа одговорност за тоа. Тие се пожалија дека нивните забелешки не биле разгледани во партијата, поради што се одлучиле да ги споделат со јавноста, членството и со гласачите.
Меџити истака дека го избрале овој начин на делување, бидејќи во партијата им било кажано дека повеќе нема да има средби за ова прашање. Анализата содржеше оценка за реализацијата на 170 ветени предизборни проекти за периодот 2020-2022 година.
Н. Абдурахмани