Градоначалникот на Струга Рамиз Мерко кој од неодамна е ставен на црната листа на САД, соопшти дека ќе биде отворен за соработка за секој процес пред правосудните органи и оти и општината и тој навреме ќе ја достават секоја потребна документација.
– Од претседателот Вилсон па сѐ до ден денес, Соединетите Американски Држави се наш сојузник во секој предизвик и заедно реализиравме многу значајни проекти за државата, градот и граѓаните на Струга. Секогаш ја поздравувам и ја поддржувам континуираната американска поддршка за нашата земја и граѓаните на Струга, наведува Мерко.
Тој, како што напиша на ФБ страната на опоштина Струга, не сакал да комуницира во корист на процесите, за кои вели „ќе бидам отворен како и секогаш за поддршка на правдата и за секој процес пред правосудните органи“.
– Во интерес на процесот, решив да ја замрзнам секоја активност во партиските структури до затворање на важните процеси за сите. На крајот, сакам да му се заблагодарам на секој граѓанин за поддршката низ годините, но и поддршката што не ја штедевте и овие денови за кои, убеден сум, ќе ги надминеме заедно за да создадеме услови за подобар живот на стружани и за Струга што ја сакаме, се наведува во соопштението објавено на Фејсбук страната на Општина Струга.
Претходно, од Јавното обвинителство на РСМ информираа дека четиричлена комисија од јавни обвинители од ЈОРСМ денеска врши надзор на постапувањето во предметите поврзани со струшкиот градоначалник во Основното јавно обвинителство Струга и Вишото јавно обвинителство ЈО Битола.
Од Јавното обвинителство најавија дека по целосните проверки на постапувањето, комисијата ќе изготви извештај.
Обвинителството во четвртокот соопшти дека има шест активни предмети против струшкиот градоначалник. Оттаму посочија дека исклучително сериозно ги земаат предвид сознанијата на американскиот Стејт департмент за потенцијално влијание од страна на Мерко врз постапките.
Фото: Цивил архива
