Финска е нова членка на НАТО. Историски момент и важен чекор напред за понатамошно зајакнување на трансатлантската стабилност, објави министерот за надворешни работи Бујар Османи на својот профил на Фејсбук по повод приемот на Финска во членство во Алијансата.
Северна Македонија која денес титулата „најмлада земја членка на НАТО“ ја предава на нашиот најнов сојузник – Финска, останува силен поддржувач на политиката на Отворени врати на НАТО како една од најуспешните политики на Алијансата. Во денешната сложена безбедносна архитектура ваквиот чекор претставува силна потврда за единството на сите сојузници и значаен влог во целокупната трансатлантската сигурност. Очекуваме што поскоро да има напредок и во апликацијата на Шведска и земјата да стане дел од трансатлантското семејство пред НАТО Самитот во Вилнус, наведе Османи во честитката до Финска.
Како што соопшти МНР, Османи воедно ја истакна и силната политичка и практична поддршка за Украина, што е во фокусот на разговорите на Комисијата „НАТО – Украина“, на која учествува и украинскиот министер за надворешни работи Дмитро Кулеба.
Финска беше примена во членство во НАТО на денешниот состанокот во Брисел на шефовите на дипломатиите на земјите членки на Алијансата, на кој учествува и Османи.
На маргините на состанокот, Османи имаше средба со неговиот естонски колега Урмас Реинсалу, при што истакна дека имајќи ја предвид геополитичката ситуација, вклучително и во регионот на ОБСЕ, оваа Организација е, и треба да остане, една од најзначајните меѓународни платформи за дијалог.
Разговаравме и за останатите приоритетни прашања во работата на ОБСЕ за време на претседавањето на Северна Македонија со Организацијата во 2023 година и напоменав како организација, ОБСЕ е потребна на светот како никогаш претходно, наведе на Фејсбук Османи, кој воедно е и актуелен претседавач со ОБСЕ.
