ЏАБИР ДЕРАЛА
„Со оглед на зголеменото ниво на претпазливост кое мораме да ги имаме поради чекорите околу францускиот предлог, потенцијалното предавство на државните и национални интереси, решив одлуката за таквите протести да ја измениме и целосно да се фокусираме на решението“ – рече Мицкоски на прес конференција вечерта на 30 јуни пред Белата палата (која е на „добош“).
Што значи ова? Ништо друго, освен збунето и лошо формулирано признание.
Мицкоски го призна тоталниот пораз на неговата политика на блокади. Значи, ќе престанел со протести, за да се фокусира на францускиот предлог? Поради „потенцијалното предавство на државните и национални интереси“? Потенцијалното! Мислам дека не можеше да биде посмешно.
Само уште празните столчиња му се послушни на Мицкоски, а веројатно ни тие нема уште долго да го следат. Соочен со неуспехот на неговата партија и неговите сојузници во „неполитичките“ формации, како што се синдикалните лидери под контрола на вмро, Мицкоски реши да смени „стратегијата“. Виде дека не му поминуваат протестите на кои, наместо луѓе, му доаѓаат столчиња.
Колку и да нема контакт со реалноста, Мицкоски, конечно сфати дека блокирањето на сообраќајниците со мали групи партиски пешадинци, само ги револтира луѓето.
Без престан, вмро го контаминира јавниот простор, медиумите и социјалните мрежи со личните амбиции на една мала група луѓе што ги зграпчиле фотелјите во Белата палата и не ги пуштаат.
За Мицкоски, сите се предавници, макари и „потенцијални“, хахаха! Само тој е на „браникот“ на националните интереси.
Ова е уште еден очигледен пораз на политиката на блокади, опструкции и манипулации. Мицкоски и нему послушните и сличните, а сите заедно, послушни се знае кому, во континуитет ги блокираат сите клучни процеси и националните интереси на државата. За да ги задржат позициите, евентуално и да се дограбат до власт, ним им одговара изолација и политичка, економска и безбедносна нестабилност на Македонија. Само тоа ги спасува – хаос и насилство.
Со ставот на Ковачевски искажан на прес конференцијата во Брисел на 23 јуни, поддржан од Рама и со симпатиите и поддршката од најголем дел земји членки на ЕУ, уште еднаш беше поразена бугарската апсурдна политика и ја натера да се повлече со подвиткана опашк. И ете го Мицкоски, сега ќе престане со протести за да се посвети на француската пудлица, пардон, францускиот предлог. Ковачевски објавува и повикува новиот предлог да биде разгледан во најшироки можни рамки, во „широк консултативен процес најпрво во Владата и коалициските партнери, а потоа и со претседателот на државата, со Парламентот и со опозицијата, како и со граѓанскиот сектор, експертската и севкупна јавност во земјата.“ А Мицкоски бара предлогот да се објави на веб страницата на Владата! Па добро, џе је ту логика? Или премногу барам?
Ова ме потсети на една сцена, кога низ целата земја пожарникарите се бореа со огнената стихија во јули 2021 година, се појави со полалитарско шишенце вода, да држи лекции пред камерите.