Претседателот на ВМРО-ДПМНЕ, Христијан Мицкоски во гостувањето на ТВ „Алсат М“, зборувајќи за оставките на премиерот и претседател на СДСМ, Зоран Заев, изјави дека владејачката СДСМ на 12-ти овој месец ќе одржувала изборен конгрес во ист ден со најавениот конгрес на неговата партија.
„Да, неговата позиција сега е таква да вели, на 12-ти ќе имаме изборен конгрес, или веќе како го нарекуваат тоа што ќе се случува, исто така политички некултурно, бидејќи пред еден месец ние го закажавме нашиот редовен конгрес, и малку е непријатно и политички некултурно, во истиот ден да закажувате изборен конгрес.“, изјави Мицкоски на Алсат.
Тврдењето на Мицкоски дека ВМРО-ДПМНЕ на 12 декември во Скопје ќе одржи Конгрес на кој ќе се избира лидер на партијата е точно. Но, неговото тврдење дека СДСМ ќе одржи изборен конгрес за лидер на партијата на истиот датум со ВМРО-ДПМНЕ – не е точно.
Имено, На 12 декември СДСМ ќе одржи избори за претседател на партијата, што може да се види и од соопштението на владејачката партија „Започна постапката за кандидирање за претседател на СДСМ, изборите на 12 декември“, објавено на 27 ноември 2021, но и од партиската страница на СДСМ, каде на видливо место стои банер за „Вонредни внатрепартиски избори за Претседател на СДСМ“.
Според ова, тврдењето на Мицкоски дека СДСМ организира изборен конгрес на ист ден со претходно закажаниот конгрес на ВМРО-ДПМНЕ е невистинито и не ја поминува проверката на фактите.
Иако оваа невистина можеби делува како незначајна, таа може да доведе до заблуда кај дел од публиката, а кај дел да резултира со намалена доверба и во политичарите, но и во медиумите. Затоа, политичарите треба да покажат далеку поголема одговорност кон јавноста во изнесувањето на тези и информации, а медиумите да ги проверуваат поревносно нивните тврдења, затоа што тие се филтерот кој ја заштитува јавноста од невистините и дезинформациите.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски