Многу млади луѓе од Македонија со спакувани куфери го пречекаа 31 мај, кога Собранието ја изгласа новата Влада на Зоран Заев. Им поверуваа на преизборните ветувања на СДСМ дека како владејачка партија, ќе спроведат политики што ќе ги стимулираат младите да останат во својата држава.
Сега тие го следат секој чекор на Владата, секој потег на министрите, на вицепремиерите, на премиерот Заев… А, во говорите на политичарите речиси неизбежни се ветувањата и пораките, дека младите се приоритет на оваа Влада, која што ќе создаде услови за отворање нови перспективи за нив.
„Со нашата креативност, мудрост и знаење, заедно ќе одржиме лекција дека Македонија може да биде едно среќно и поперспективно место за живот за сите граѓани, а посебно за младите. Животот е нашето мото, им го ветивме на граѓаните и сега наша должност е тие да го почувствуваат и да го конзумираат од позитивен аспект, секојдневно“ им порача премиерот Заев, од позиција на партиски лидер, на членовите на Социјадемократската младина на Македонија, на летниот камп што деновиве се одржа во Охрид.
„Младите се сегашноста и иднината на Македонија“, рече Александар Кирацовски на летниот камп на СДММ.
„Наша приоритетна цел е младите да ја проектираат и да ја градат својата иднина во сопствената татковина, во Македонија!Сега заедно работиме на отворањето нови песпективи за младите и на нивна интеграција во општеството. Главниот акцент е ставен токму врз мерките со кои ќе се подобрат животот и стандардот, а младите ќе дојдат полесно до прво вработување. Воведување на проект ‘Гаранција за младите’, ќе обезбеди во период од четири месеци по завршување на школувањето, секој млад човек да добие понуда за вработување, можност да го продолжи образованието, да стапи на пракса или тренинг за подготовка за вработување. Тоа е реална младинска политика и јадро на политиките за вработување“, вети и министерот за внатрешни работи, Оливер Спасовски, говорејќи пред многуте невработени млади социјалдемократи, од позиција на потпретседател на партијата.
Но, во Македонија не се само партиските членови. Во Македонија живеат и илјадници други талентирани, едуцирани млади луѓе што не се членови не само на СДСМ, туку на ниту една друга партија. Многумина од нив, својот глас на овие избори го дадоа за СДСМ, изразија поддршка за работата на новата Влада.
Денеска е 43 ден, брзо ќе поминат и 100 дена од работата на новата Влада, кога ќе се прави резиме од сработеното. А, очекувањата на младите се огромни. Се надеваат дека покрај критиките за работата на ексвладејачката ВМРО-ДПМНЕ, која што без поговор вработуваше само партиски војници, и нереално ја прикажуваше сликата со невработеноста, сега за оваа Влада, критериуми за вработување ќе бидат знаењето и вештините што ги поседуваат младите, а не нивните партиски книшки.
Стотици неопределни млади во оваа држава, одбиваат да го „купат“ бугарскиот пасош, што е гарант за успешна иднина во развиениот свет. Стотици неопределени млади во Македонија, избираат сега свесно да останат во својата татковина, со верба дека новата власт ќе создаде клима за да се отворат брзо нови работни места, дека за нив ќе има пристоен живот, пристоен стандард, квалитетно образование и наградба на своите знаења и вештини.
Но, овие луѓе немаат многу време за чекање. Следејќи ги примерите на своите родители, кои што половина живот поминаа во неостварени надежи за подобра Македонија, новите млади генерации сега бараат брзи и квалитативни реформи.
Не ветувања, бараат дела од новата власт! Тоа е нивната порака! Часовникот одбројува и за новата Влада!
Моника Талеска