Министерството за надворешни работи на Украина најостро ги осудува најновите масовни терористички напади врз украинските градови, извршени од страна на Руската Федерација на 24 и 25 мај 2025 година, стои во денешната изјава на Министерството за надворешни работи на Украина.
Министерството потврди дека во текот на овие денови, Русија изврши еден од најголемите комбинирани воздушни напади од почетокот на нејзината агресија. На ноќта меѓу 23 и 24 мај, руските окупациски сили лансираа 264 средства за воздушен напад, вклучувајќи 14 балистички ракети „Искандер-М“ и 250 ударни беспилотни летала од типот „Shahed“. Нападите продолжија и на 25 мај со масовен ракетен напад, вклучувајќи стратегиски бомбардери Ту-160 и Ту-95МС, кои лансираа крстосувачки ракети Х-101, како и ракети „Калибр“ од Црното Море.
Ноќта меѓу 24 и 25 мај, непријателот изврши комбиниран напад со 367 средства за воздушен напад, вклучувајќи 9 балистички ракети „Искандер-М“, 55 крстосувачки ракети од воздух и море, 1 ракета Х-22, 4 управувани авионски ракети Х-59/69 и 298 ударни беспилотни летала од типот „Shahed“
Особено интензивни беа нападите врз Кијив, но ракетни и дронски напади беа извршени и врз областите Днипропетровска, Донецка, Житомирска, Запорижска, Кијивска, Миколаивска, Одеска, Сумска, Тернопилска, Харкивска, Хмелницка и Черниговска. Русија целеше кон станбени квартови, студентски домови, трговски центри, училишта, болници и други објекти без воено значење.
„Како резултат на овие терористички напади, загинаа десетици цивили, а над стотина беа повредени. Овие варварски напади претставуваат директно кршење на меѓународното хуманитарно право и Женевските конвенции, и се воени злосторства и злосторства против човештвото“, изјави МНР на Украина.
Според министерството, ова е доказ дека рускиот агресор нема намера да ја прекине агресијата и теророт врз цивилното население.
„Руските напади повторно покажуваат дека Руската Федерација нема намера да ја прекине агресивната војна против Украина и теророт врз цивилното население. Особено цинично е што нападите се случија во време на активни мировни напори од страна на Украина и нејзините меѓународни партнери. Руската Федерација покажува целосно непочитување кон меѓународните мировни иницијативи и продолжува со теророт наместо со конструктивен дијалог“, се вели во изјавата на министерството.
Понатаму, МНР на Украина нагласи дека Москва разбира само јазикот на силата, економскиот притисок и изолацијата и ја повика меѓународната заедница да преземе решителни дејствија.
„Нагласуваме дека Москва разбира само јазикот на силата, економскиот притисок и изолацијата. Само решителни дејствија од страна на меѓународната заедница, зајакнување на санкцискиот притисок и обезбедување на неопходни одбранбени средства за Украина може да го натераат агресорот да го прекине теророт“, повика МНР на Украина.
Барањата на Украина се конкретни – притисокот врз Русија ќе ја зајакне Украина, но неопходно е обезбедување на дополнителни воздушни системи.
„Ги повикуваме нашите партнери да го зголемат притисокот врз Русија и да ја зајакнат Украина, вклучувајќи обезбедување на дополнителни воздушни системи како Patriot, IRIS-T, NASAMS и други, како и муниција за нив“, изјави украинското МНР.
Исто така, Украина повика на заострување на санкциите против руските капацитети да ја одржува воената агресија, наведувајќи конкретни области каде што тие мерки се неопходни.
„Ги повикуваме на заострување на санкцискиот режим против руските воено-индустриски претпријатија, енергетскиот сектор, сите руски банки и Централната банка на Руската Федерација, како и други области“, повикува Украина.
Исто така, Украина инсистира и на казнување на воено-политичкото раководство на РФ за злосторствата на агресија, воените злосторства и злосторствата против човештвото.
„Инсистираме на неизбежноста на казнување на воено-политичкото раководство на РФ за планирање, организирање и извршување на злосторства на агресија, воени злосторства и злосторства против човештвото на територијата на Украина, и ја повикуваме меѓународната заедница да обезбеди нивно изведување пред правдата“, повикува МНР на Украина Украина.
Според украинското МНР, Русија мора да сноси целосна одговорност затоа што нејзините злосторства ја поткопуваат и глобалната безбедност и стабилност.
„Русија мора да сноси целосна одговорност за своите дејствија, кои не само што претставуваат закана за Украина, туку и ја поткопуваат глобалната безбедност и стабилност. Украина ќе продолжи да ја брани својата територијална целовитост, суверенитет и право на постоење со сите достапни средства, дејствувајќи во рамките на меѓународното право“, заклучува МНР на Украина во својата денешна изјава.
ЦИВИЛ претходно објави дека државата терорист го ескалира ракетниот терор против цивилите со што ја докажува единствено решеноста на Путин да ја продолжи својата злосторничка војна против Украина. Додека Украина продолжува да го брани својот суверенитет, одговорот на меѓународната заедница останува клучен во обликувањето на траекторијата на војната. Исто така, ЦИВИЛ преку повеќе соопштенија повика да се стави крај на рускиот терор, меѓу другото и со соопштението под наслов „Стоп за злото – Рускиот ракетен терор мора да престане веднаш!“.
Џ. Д.
