Министерството за труд и социјална политика информира дека утрово утрово започна најавениот штрајк во јавните предучилишни установи за деца- детски градинки, и дека згрижувачко-воспитната дејност во предучилишните установи непречено се одвива и во време на штрајк, пренесува МИА.
– Од вкупно 75 јавни установи за згрижување и воспитание на деца од предучилишна возраст, штрајкот на дел од вработените се одвива во 54, а во 21 Јавна установа вработените воопшто не се приклучија кон штрајкот организиран од СОНК.
Само во една односно во ЈОУДГ „Детска Радост“, Гази Баба, Скопје, воопшто во текот на денот не се згрижуваа деца, а во ЈОУДГ „Пролет“ Карпош, се згрижуваа деца само во еден објект. Во сите останати предучилишни установи и покрај одржување на штрајкот на вработените во градинките, непречено се одвива згрижувањето и воспитанието на децата, информира МТСП.
Целокупната состојба на терен потврдува дека установите и вработените го почитуваат Законот за заштита на децата и ја обавуваат дејноста згрижување и воспитание на деца од предучилишна возраст и при остварувањето на правото на штрајк обезбедуваат непречено одвивање на дејноста, стои во соопштението на Министерството.
Заштитата на децата и нивните права останува да биде високо на агендата на приоритети на Министерството за труд и социјална политика, додаваат оттаму.
Најголем дел од детските градинки работат и ги згрижуваат децата, мал дел градинки во Гази Баба, во Бутел и една градинка во Карпош не работат. Останатите градинки во државата, ги згрижуваат децата и имаат воспитувачи и негователи, кои не штрајкуваат и ги згрижуваат децата, рече министерката за труд и социјална политика, Јованка Тренчевска во емисијата Студио 10 на Телевизија 24.
Воедно, таа посочи дека едно од барањата на СОНК е усогласување на Колективниот договор со минималната плата и покачување на платите на воспитувачите и негувателите за 18,4 проценти за кое и единствено се разговарало на состаноците, додека за другите барања на СОНК , а кое се однесуваат на почитување на работното време, во делот на приправниците, унапредувањето од пониско кон повисоко работно место, почитување на нормативите за конституирање на групите, водењето на еден дневник и кариерниот развој на воспитувачите и негователите, не се отворила дискусијата.
Во однос на платите на вработените во детските градинки, министерката истакна дека од 2017 година, тие бележан континуиран раст.
– Во 2017 година, платата на воспитувач била 18.300 денари, денес во февруари платата е 26.574 денари. За негувател сега просечна плата е 19.560 денари, а во 2017 година негователот земал плата 14.493 денари. Ова покажува дека платата е покачена за околу 21 процент, а техничкиот персонал доби покачување со Законот за минимална плата и нема пониска плата од 18.000 денари, рече Тренчевска.
Исто така, министерката додаде дека со барањето за покачување негователите би добиле околу 24.000 денари, нето плата, без минат труд, додека пак, воспитувачите 30.500 денари.
Министерката, ушто посочи на тоа дека во услови на најголема светска економска и енергетска криза во поново време и во услови кога државата го финансиски го поддржува приватниот сектор, за да се задржи ликвидноста на компаниите и се обезбеди на плата за јавниот сектор, во време кога се покачи минималната плата и пензиите, покачувањето на платите на јавниот сектор може да почека.
– Социјалниот дијалог продолжува, потребно е да разговараме и за барањето за усогласување на платите, но и за останатите барања, за нов колективен договор, со оглед дека сегашниот завршува на крајот од јуни и за сите барања кои значат повеќе права за вработените во Јавните установи за згрижување на деца од предучилишна возраст, посочи Тренчевска.
