„Да се врати извршувањето во судовите. Таа идеја е далеку од паметот!“ Овој коментар е всушност, ставот на портпаролот на Комората на извршители на Македонија, Гордан Станковиќ, по бурните реакции на граѓаните на социјалните мрежи, коишто бараат укинување на приватното извршување и враќање на постапката во судовите, како порано.
Станковиќ во интервју за ЦИВИЛ Медиа изнесува и низа интересни аспекти „за“ и „против“ измените на законската регулатива што го детерминира процесот на извршување, за што се залагаат не само јавни претпријатија, што доставија претставки до Уставниот суд, туку и незадоволни граѓани, но и правни експерти, според кои, треба да прекине „побизнисувањето“ на извршната функција и печалењето на извршителите – на сметка на должниците.
„Главниот проблем во законот го лоцирам во криво поставениот пат за да се дојде до добар закон. Сега одиме по патот на потребите што ги регистрираме од јавноста, или со друг збор – популизам. Сè што е во рамките на популизмот, бидејќи тоа носи гласови, стана погонска енергија на пишувачите на законот, да излезат пресрет на желбите на популизмот. Тоа се гледа во подобрување на позицијата на должникот, во пролонгирање на постапката, во потребата да се намалат трошоците на извршувањето, во потребата извршувањето да биде што е можно поповолно за должникот. Извршувањето не постои за да имаме популизам, за да имаме добар однос кон должниците. Тоа е измислено за друга работа, за да има право! Тоа е цената на правото. Не може да имате и правда и социјална сигурност! Тие две работи не одат рака под рака, тие се спротивставени“, категоричен е извршителот Станковиќ.
Во одбрана на своите ставови, тој се навраќа на периодот од поранешна Југославија, кога, како што вели, „имаше регулатива што даваше многу права на должникот, но што излезе од тоа?“
„Ништо, тотално беззаконие. Од тоа се распадна државата, бадијала постои суд, можеш слободно да го укинеш судот. Добивме 500 до 700 нерешени предмети, сега некој во таа ситуација ја истакнува идејата да се врати извршувањето во суд… Мене тоа не ми влегува во глава. Како е можно, сите да сме сведоци на извршувањето што траело од 1945 наваму, всушност, овој систем е замислен од Кралството Југославија, и тој систем видовме како функционира, добро во однос на должникот, ама абер нема со примена на правдата! Ниту го штити сопственикот, ниту го штити капиталот, ниту го штити системот! Тоа е едно маткање, паткање, шетање … Јас сум бил адвокат, постапките ги водевме до правосилност, кога ќе се завршеше постапката со пресуда, најголем дел од адвокатите не сакаа да работат, зашто тоа е напразно губење време, нервоза… Е, сега, се измисли нов систем којшто сето тоа го решава во добра мера и некој повторно вели – да се врати во судот. Па, нека се врати. Лично, сметам дека е тоа дискусија што е далеку од паметот“, коментира портпаролот на КИРМ, Станковиќ.
Факт повеќе за да остане приватното извршување, според Станковиќ, се примерите во сите европски држави, освен Германија, каде што има државно извршување.
„И земјите со континентално и со англиско право, сите имаат приватно извршување. А, има повеќе причини за тоа. И тие причини не треба да бидат ставени во дускусија, зашто општата јавност не ги разбира“, оценува извршителот Станковиќ.
Моника Талеска
Камера: Дехран Муратов
