Десничарската партија ГЕРБ на поранешниот премиер Бојко Борисов е победник на вчерашните парламентарни избори во Бугарија, седми во последните две години, покажуваат првичните прелиминарни резултати од гласањето.
Како што пренесува МИА, ГЕРБ освои 25 отсто од гласовите, што е за околу 10 отсто повеќе од реформистичката коалиција на партијата „Промените продолжуваат“ и десничарската Демократска Бугарија.
Конечните резултати се очекуваат денеска, а доколку првичните податоци се покажат како точни, Борисов ќе добие мандат да ја формира својата четврта влада, но ќе мора да бара коалициски партнери за формирање на кабинет.
Политичките аналитичари прогнозираат дека и овие резултати, кои не се значително различни од претходните шест избори одржани во последните три години, може да доведат до нови избори.
На последните избори одржани во јуни, немаше јасен победник, а седумте групи избрани во парламентот не беа во можност да формираат одржлива коалиција. Набљудувачите сугерираат дека вчерашното гласање ќе доведе до потешки преговори меѓу групите во парламентот, особено што сега се очекува во парламентот да влезат девет партии.
Серијата неуспешни избори имаше сериозно влијание врз бугарската економија и нејзината надворешна политика. Земјата ризикува да загуби милијарди евра од фондовите за обновување на ЕУ поради недостаток на реформи. Целосната интеграција во отворената Шенген зона и приклучувањето кон еврозоната најверојатно дополнително ќе бидат одложени.
Како што пренесува Фактор.бг, Европската народна партија (ЕПП), чија членка е ГЕРБ, упати честитка до лидерот Бојко Борисов и партијата за победата на изборите што се одржаа денеска.
„Честитки до Политичката партија ГЕРБ и Бојко Борисов за успешните изборни резултати“, напиша ЕПП.
Победата на ГЕРБ го исполни посакувањаето на премиерот на Северна Македонија, Христијан Мицкоски, кој пред изборите во Бугарија истакна дека посакува победа на ГЕРБ на Бојко Борисов, што според него е логично бидејќи двете партии се дел од Европската наодна партија.
„Со партијата ГЕРБ што ја води Бојко Борисов сме во исто политичко семејство, во Европската народна партија. Изборот е логичен“, рече Мицкоски, прашан кого би издвоил како подобар соговорник, дали Бојко Борисов од ГЕРБ или Кирил Петков од Продолжуваме со промената (ПП).
Да потсетиме, предходно Мицковски, додека беше во опозиција, на прашањето на Борисов „Дали вие ќе го подкрепите договорот…“, одговори потврдно на бугарски јазик .
„Сѐ што може да биде позитивно и за двете страни, и за Македонија и за Бугарија ние ќе подкрепиме“ – одговори тогаш Мицкоски со сведната глава.
М. Д.
