И денеска партиите се препукуваат кој е крив за загадениот воздух што го дишат македонските граѓани. Додека се на власт велат дека работат да се намали загаденоста, кога се во опозиција забележуваат дека дишат токсичен воздух.
СДСМ: Каде е милијардата на Мицкоски за борба со загадениот воздух?
Од СДСМ велат дека Скопје продолжува да биде меѓу најзагадените градови во светот, граѓаните дишат загаден воздух и во други градови. Иако ВМРО-ДПМНЕ ветуваше активна борба со аерозгадувањето граѓаните гледаат дека ниту градоначалниците од оваа партија ниту пак централната власт презема нешто.
Од таму додаваат дека додека беше во опозиција Христијан Мицкоски ветуваше 1 милијадра евра инвестиции за заштита на животната средина и намалување на загадувањето до 50%.
„Дојде на власт, седна во фотелјата и Мицкоски не прави ништо, ниту има инвестиции, ниту мерки против загадувањето“, велат од СДСМ.
Во мандатот на СДСМ, потенцираат, во Град Скопје се набавија нови 33 еколошки автобуси на гас, се направија 300.000 м2 со ново зеленило и се засадија над 20.000 нови дрвја и садници, во 13 средни средни училишта се поставија енергетски фасади и прочистувачи, заменети беа котлите за греење на државните згради и во училиштата, се субвенционираа инвертери, велосипеди, активните оџаци се намалија за 8.000, на 3.000 m3 подигнати стрништа, затворени беа сите диви депонии во градскиот урбан опфат.
„Дојде ВМРО-ДПМНЕ на власт и не се прави ништо. Нема нови автобуси, нема еколошки транспорт, нема ниту нови зелени површни, паркови, засадени дрвја. Депониите не се чистат, ѓубре има на секој чекор, не гледаме ниту еден еколошки проект ниту пак мерки за намалување на загадувањето. Дури и долгорочните проекти за еколошки јавен транспорт како на пример проектот БТР со целосно обезбедени пари, ВМРО-ДПМНЕ ги запре. Поразително е тоа што власта на ВМРО-ДПМНЕ не прави ништо додека граѓаните дишат загаден воздух“, велат од СДСМ.
ВМРО-ДПМНЕ: „Зелениот“ ДУИ и СДС останаа само на празни зборови за загадениот воздух, Владата на ВМРО-ДПМНЕ стартуваше со ветерен парк, доделување на инверетери, се работи и на гасификација
„А што имаше во време на СДС(М) и ДУИ? Мерните станици честопати беа расипани и не функционираа. СДС(М) во изминатите 7 години трошеа милионски буџети, а за подобрување на квалитетот на воздухот не вложија ништо. Проблемот со загадувањето е голем и потребно е сеопфатна стратегија која на долг рок ќе даде резултати. ВМРО-ДПМНЕ има системски решенија за квалитетен воздух и намалување на урбаното загадување. ВМРО-ДПМНЕ има план за екоиновации за одржлив развој каде преку зелениот фонд ќе се поддржува посебни програми за поддршка на стартап компании и иновации кои ќе работат на проекти за помало загадување и заштита на животната средина. ВМРО-ДПМНЕ стартуваше со ветерен парк во источниот дел на Македонија. Владата на ВМРО-ДПМНЕ додели ваучери за инвертер клими за нешто повеќе од 6 илјади граѓани. Владата на ВМРО-ДПМНЕ работи на гасификација на целата држава“, велат од ВМРО-ДПМНЕ.
Визијата на ВМРО-ДПМНЕ, нагласуваат, е еколошки, конкурентен и стабилен енергетски систем кој се темели на принципите на сигурност ефикасност и одржливост.
Д. М.
