Повеќе од 150 Срби од Косово вчера тргнаа пеш кон Белград, за да присуствуваат на собирот во сабота на 12 април, по повод формирањето на Движењето за народот и државата, што претседателот на Србија, Александар Вучиќ, го најавува за следниот викенд, јавуваат српски медиуми, пренесе ЦивилМедиа.
Срби од Грачаница и околните градови во централно Косово, Косовско Поморавље, Северна Митровица, Звечани, Зубин Поток и Лепосавиќ тргнаа во колона на пат од 250 километри.
„Лошото време, дождот и снегот нема да не спречат да ја постигнеме целта и да дојдеме живи и здрави на големиот митинг што се одржува во сабота. Ние од Косово ќе го браниме нашето Косово и во Белград затоа што нашата земја е нападната и однадвор и одвнатре“, изјави параатлетичарот Иван Цветковиќ од селото Стража во општина Ново Брдо.
Вучиќ претходно ги покани граѓаните на митинг на 12 април на „ТикТок“, со напомена дека „веќе неколку месеци „однадвор и од внатре“ се организира обид за рушење на Србија“ и дека, како што рече, „мора да ја вратиме украдената држава“.
„Вие одлучувате во каква земја сакате да живеете. Се прашувате. И да, утре може да биде доцна. Србија ќе победи! Се гледаме во Белград на 12 април во 19:00 часот“, рече Вучиќ во објава на TikTok.
Претседателот на Србија претходно најави дека на средбата во Белград ќе биде претставено движењето за народот и државата, кое тој го иницираше.
Во Белград на 24 март се одржа првиот состанок на иницијативниот комитет за формирање национално движење за народот и државата, на кој присуствуваше и претседателот на Србија, Александар Вучиќ.
По средбата тој изјави дека е време да се артикулира големата сила на српскиот народ и да се обединат сите умови и патриотизам за да ја обликува посакуваната иднина.
Д. Т.
