ВЕСТ НА ДЕНОТ
Според најновите податоци во денешните два земјотреса во рок од 12 часа што ги погоди Туркије и Сирија загинаа повеќе од 2.000 луѓе. Се очекува зголемување на бројот на жртви, а во тек се спасувачки операции. Според официјалните податоци на Туркије загинале 1.014, а 5.383 лица се повредени, додека се урнале 2.818 згради.
ИЗЈАВА НА ДЕНОТ
„За жал, роденденот на Гоце Делчев беше искористен од другата страна за кревање на тензиите по мене сосема непотребно. Меѓутоа, мислам дека е неподелена оценката 4 февруари и од наша страна како држава сосема до крај, стопроцентно го положивме испитот и покажавме како една сериозна европска држава треба да се однесува со почитување на правата на луѓето да одат на почит на големиот македонски револуционер и притоа да се изолирааат сите што доаѓаат со лоша намера, односно доаѓаат со намера да провоцираат и да предизвикуваат немири“, истакна Пендаровски.
ФЛЕШ ВЕСТИ
МНР Повредени се двајца македонски ученици во земјотресот во Туркије. Едниот ученик има скршеница, а другиот полесни повреди, информира Министерството за надворешни работи. Во југоисточна Туркије каде утринава беше регистриран силен земјотрес се наоѓаат вкупно девет македонски државјани, осум ученици и нивниот ментор кои преку програмата „Еразмус плус“ престојуваат во Турција и не се во животна опасност.
СРЕДБА Премиерот Димитар Ковачевски денеска се сретна со претседателката на Унгарија, Каталин Новак, која е во посета на земјава. На состанокот, како што информираат од Владата, било изразено очекување дека оваа посета ќе даде поттик за интензивирање на билатералните односи помеѓу двете држави, посебно што ова е прва посета на унгарски претседател на Северна Македонија во последниве 20 години.
-Пренесена е јасна порака дека нашата држава може да смета на натамошната поддршка од Унгарија во европските интеграции. Оценето е дека Република Северна Македонија ѝ е потребна на Европската Унија, во делот на безбедноста и стабилноста, и како држава којашто практикува европски вредности, и чијашто култура е посебна и европска и ќе го збогати европското семејство на народи, држави и култури, се вели во денешното соопштение од Владата.
ИНТЕГРАЦИИ Во Брисел денеска почна билатералниот скрининг состанок за Поглавјето 1 – „Слободно движење на стоки“, кое е дел од вториот кластер „Внатрешен пазар“. Делегацијата на Северна Македонија ја предводи заменичката на главниот преговарач на Република Северна Македонија со ЕУ, Дрита Абдиу-Халили која го посочи напредокот и спроведените реформи во ова поглавје, со конкретни активности.
ЕУ Високиот претставник на ЕУ за надворешна политика и безбедност, Жозеп Борел утринава се огласи по разорниот земјотрес што денеска ги погоди Туркије и Сирија и однесе голем број животи и најави помош од ЕУ. „Нашите мисли се со народот на Туркије и Сирија. ЕУ е подготвена да помогне“, напиша Борел на Твитер.
КУЛТУРА Претседателката на Антикорупциската комисија за ЦИВИЛ Медиа изјави дека се чека извештај од Државниот завод за ревизија во врска со исплати од Филмскиот фонд, за филмови врзани со режисерот Милчо Манчевски и други режисери, но директорот на фондот Бојан Лазаревски вели дека откако тој е на позицијата директор на оваа институција никој не побарал документи за истрага.
ДЕЗИНФОРМАЦИИ
Пратеникот од ВМРО-ДПМНЕ, Драган Ковачки дезинформира дека вицепремиерот Артан Груби не се поклони на одбележувањето на роденденот на Гоце Делчев.
Всушност, вистината е дека вицепремиерот Артан Груби му оддаде почит и се поклони пред гробот на Гоце Делчев, заедно со премиерот Димитар Ковачевски, министерката за одбрана, Славјанка Петровска, министерот за внатрешни работи, Оливер Спасовски и министерката за култура Бисера Костадиновска Стојчевска.
СЛОБОДНА ЗОНА
„Северна Македонија ѝ ги расипа плановите на Москва и не дозволи растечките тензии меѓу Скопје и Софија да се претворат во отворен конфликт, иако беа доведени многу блиску до таа граница, откако чествувањето на годишнината од раѓањето на идеологот и организаторот на македонското револуционерно дело Гоце Делчев беше прогласен за настан од висок безбедносен ризик по што државата ги презеде сите неопходни мерки за да го стави под контрола“, пишува Зоран Бојаровски во анализата „Од „љубовта“ на Москва и кон Делчев и санстефанска Бугарија настрадаа македонско-бугарските односи“.
„Повторно под хипнотичното дејство врз медиумите и воопшто врз јавноста, која со опсесивна фиксација се бави со “бугарските” егзибициски изјави, во Собранието се протнува вмровска инцијатива за донесување на закон за амнестија за осудените од 27 април. За, Крвавиот Четврток!
Reality check, hallo!“, пишува Ана Чупеска во колумната „ВМРО АМНЕСТИЈА“.
„Бугарите не се перчат на некоја велесила во Европа, туку не бербатат нас, во суштина еден добар и пријателски народ. Срамно за Бугарите, не би сакал да употребам потежок збор. Срамен е и гестот од вчера, кога беше каменуван македонскиот клуб „Никола Јонков Вапцаров“ во Благоевград. Ако вака Бугарија го замислува добрососедство и пријателство, би требало сериозно да се преиспитаат што всушност му прават на својот сосед. И ваквото однесување од Бугарите е, ќе речам уште еднаш, тешко да се разбере“, пишува Ненад Јовановиќ во колумната „Домашните опскуранти од групата „TNT“ не успеаја во својата аудиција, а Бугарите манифестираат недемократско однесување“.
Д. Муратов