Градоначалникот на Општина Ѓорче Петров, Александар Наумоски за ЦИВИЛ Медиа, даде свои видувања за моменталната политичка состојба во земјата по предвремените парламентарни избори, прогнози за локалните извори во 2021, како и за напредокот кон евроинтеграции.
ЦИВИЛ: Која е Вашата оценка за политичките состојби и процеси по предвремените парламентарни избори кои се одржаа во јули?
Наумоски: Политиката е сè уште во сенка на пандемијата со Корона кризата. Сите политики кои се креираат се директно поврзани со Ковид-19. Но, мора да научиме да живееме со маска, а да влечеме правилни потези. Во изминативе 8 месеци оваа Влада донесе низа мерки како баланс меѓу здравствените препораки и функционирањето на економијата. Секогаш има незадоволство, но согледувајќи ја нашата положба и ресурсите правиме сè да се извлече максимумот. Од друга страна, европската агенда останува приоритет и покрај сите тешкотии, но се надевам дека ЕУ ги цени нашите заложби и посветеност. Имаме функционална политичка Влада, со програма и агенда која треба да се одработи за доброто на граѓанинот.
ЦИВИЛ: До локалните избори има околу една година. Кои се Вашите прогнози?
Наумоски: Претстои година на многу работа. На започнати проекти кои треба да се довршат, проекти кои треба да започнат. Изминатите три години Ѓорче Петров конечно влезе на мапата на општини каде се инвестира и гради, а тој епитет ќе се погрижам да го задржи и во претстојната година. Сработено е многу, но децениското неработење не може да се покрие со 3 години власт. Сепак, судот е на граѓаните. Во демократијата е тастерот на довербата. Секогаш имаат право на избор, а разликата е очигледна.
ЦИВИЛ: Како локалната самоуправа во вашата општина се подготвува за интеграција во ЕУ?
Наумоски: Вложуваме многу и се трудиме да ги следиме стандардите на Европската Унија. Како локална самоуправа, соработуваме со општини од земји членки на ЕУ и кандидати за членство се со цел да создаваме партнерства со кои би ги користеле ИПА, а во иднина и структурните европски фондови. Аплицираме на сите отворени повици во рамки на разни програми на ЕУ, ги користиме сите можности за поволни заеми финансирани од Светска Банка за развој на општината.
Мора да признаам дека тргнуваме од многу ниско скалило. За да се чувствуваме европејци треба да ги задоволиме основните права и потреби на граѓаните, а тоа е пред сè инфраструктура. Сериозно вложуваме и работиме.
ЦИВИЛ: Колку и на кој начин се почитуваат европските вредности?
Наумоски: Демократијата е базична европска вредност. Отварањето на вратите на општината беше само еден исчекор кон почитување на граѓанинот. Да се чуе неговиот глас, да се даде критика, да се одговори и реагира правовремено. Жителите на Ѓорче Петров веќе 3 години активно учествуваат при креирањето на буџетот и одредувањето на приоритетните проекти. Еднаквоста, владеењето на правото, човековите права и човечкото достоинство се вредности кои општината ги почитува во своето секојдневно работење.
Но, прстот не треба секогаш да биде вперен кон општинските власти. Секој треба да придонесува за да ја има Европа поблиску до себе.
Во Ѓорче Петров има уште работа за да се освојат ѕвездите на ЕУ, но она што е важно е дека сме на добар пат кој треба да го изодиме заедно.