Навредливи зборови, говор на омраза, клевета, и поттикнување тензии. Ваквите содржини веќе не се дела само на скриени профили и анонимни ботови, туку се објавуваат и од официјален профил на еден македонски медиум – Вечер.мк кој во минатото беше познат по наративите кои го поддржуваа режимот.
“Ауууу што адреси си имал на лагер шуго, се силиш по Твитеров и после по невладини и амбасади бараш да те бранат. Тешко на нив ако ти си им избор шугави”, пишува во една од објавите на Вечер.мк на твитер.
Ова е последниот, но не и единствениот пост со ваква содржина на овој медиум. Во име на цела редакција, профилот кој носи и официјално лого на медиумот, а шири и текстови од истиот на друг пост, ги напаѓа читателите, а говор на омраза и навредливи зборови упатува и кон учесниците на Шарената Револуција: “Шарениве сте стварно тиња, мора некој да ви каже што се случува, свои очи за да гледате директно од телевизија, да читате твитови… и своја памет никогаш не сте ни имале”.
Во друга објава од последните денови Вечер.мк пишува: „Фајронт пациенти, гитла назад во шталата“. И овој пост останува на официјалниот профил на медиумот. Како за овој, така и на другите, читателите со право се прашуваат дали ова се ставови и на целата редакција.
„Борбата“ против неистомислениците оди дотаму што воопшто и нема разлика од наративот кој го користеше режимот на Никола Груевски и ВМРО-ДПМНЕ, а кој се уште се користи и денес од различни членови и функционери на оваа партија. Профилот на Вечер.мк, во објавите се користи и со „епитетите“ „соросоиди”, „комунисти”, „црни фондови”, и слично.
“Во социјализмот, мислиш, комунизам не дочекавме“
„Жално е што денес тие што политички и финансиски се наследници на социјализмот станаа шарени соросоиди без идеја, плати – носи политика.“, „Вечер е тука, со Македонците, и го читаат сајтот бесплатно. Без црни фондови, донации…”, пишува на официјалниот Твитер профил на Вечер.мк .
По сите вакви објави полни со навреди, говор на омраза, обвинувања, клевети и слични недозволиви зборови за еден медиум, јавноста го поставува прашањето: Дали исти ставови делат сите други членови на редакцијата, новинари и вработени на овој медиум?
Единствениот начин да се добие одговор на ова прашање е – вработените самите да одговорат. Да потврдат дека исто мислат или да се дистанцираат од официјалниот профил на медиумот или администраторот на истиот!
А. Зеќири
