Социјалните мрежи изминативе денови беа преплавени од реакции од немилион настан кој се случи во Нов Зеланд, каде терорист уби 50 луѓе кои се молеле во џамија. Реакциите беа различни и иако повеќето беа со пораки за солидарност, меѓутоа, секогаш се наоѓа некој кој ќе поддржува грозни убиства.
Таков е случајот со Татјана Лазаровска, вработена во АРМ, која на својот Фејсбук профил, напишала дека треба да му се даде награда за „храброста“ на терористот во Нов Зеланд.
ЦИВИЛ – Центар за слобода во своето соопштение бара од Владата и надлежните институции да преземат итни, неодложни чекори да воведат строги критериуми за оценување на луѓето што работат во нив и веднаш да ги санкционираат сите свои службеници и функционери доколку тие се служат со говорот на омразата и поттикнуваат радикализам, насилен екстремизам или на било кој начин придонесуваат кон возвишување на насилства, злосторства и тероризам.
„И по неколку дена од оваа порака, ниту Владата, ниту ресорното министерство на една земја, не излезе со јасен став и изјава во јавноста во која ќе слушнеме дека тоа лице е суспендирано, одземени ѝ се дозволите за пристап до оружје и муниција и дека е под истрага да не е дел од организирана екстремистичка мрежа. Тоа е најмалку што може да го направи владата или барем Министерството за одбрана, според некои минимални НАТО стандарди. Ако веќе ништо не значат Уставот и законите на нашата земја, како и човечноста и совеста, а би морало!“, стои во соопштението.
Активистката Месиха Смаиловиќ, по објавите на Лазаровска, на својот Фејсбук профил напиша дека ние како граѓани сме уморни да „ловиме“ поддржувачи и поттикнувачи на тероризам, омраза, убивање по Фејсбук од страна на вработени по министерствата и државните институции.
„Ве молам самите надлежни органи тоа да го направат! Ние плаќаме даноци за да ја плаќаме Татјана да користи оружје кое секој момент може да го искористи во некоја од џамиите? Ова е сериозно пишување! Истражете дали работи во АРМ и веднаш да се преземат активности на ДЕРАДИКАЛИЗАЦИЈА на истоименава. Ако се докаже дека е лажен профил најдете ја и истата да ја санкционирате“, напиша Смаиловиќ.
Џабир Дерала во денешниот рафал напиша дека е навистина чудо како Владата или барем ресорното министерство на една земја, нашата, речиси и официјално членка на НАТО, не излезе со изјава во која ќе слушнеме дека тоа лице е суспендирано, одземени ѝ се дозволите за пристап до оружје и муниција и дека е под истрага да не е дел од организирана екстремистичка мрежа. Тоа е најмалку што може да го направи владата или барем Министерството за одбрана, според некои минимални НАТО стандарди.
„Уште помалку можам да разберам (не се ни обидувам), што власта не расчистува со деструктивните и криминалните џебови во својата администрација и други служби и органи. Ни откриваат дека биле следени од подземни партиски милиции, а тие истите се дел од системот, платени со буџетски пари. И? Ништо… Фантастично! Од првиот ден по падот на режимот знаеме дека се организира „белиот штрајк“ на партиската солдатеска на која не ѝ е важно дали државата функционира, туку да се врати на власт нивната клика. Тоа се истите што, на наш трошок, со наши телефони, од наши компјутери, седнати на наши фотелји и столчиња, тролаат по социјалните медиуми, сеат говор на омраза, повикуваат на насилство, етничко чистење, верска војна, прогон и убивање на различните, го оправдуваат екстремизмот, фашизмот, тероризмот… И законот го штити тоа? Сериозно?“, пишува Дерала.
Денеска профилот на Татјана Лазаровска не е веќе достапен на Фејсбук.
МВР пред една недела најави кривична пријава по документирање на случајот со објавата на Фејсбук од извесна Фросина Тина Мартиновска. Од извршените проверки во персоналната евиденција на МВР констатирано е дека лице Мартиновска не работи во Министерството, како што беше пренесено во дел од медиумите.
„Секторот за компјутерски криминал и дигитална форензика и понатаму ќе продолжи со активностите со цел санкционирање на ваквите случаи. Ги повикуваме сите граѓани ваквите случаи да ги пријават во најблиската полициска станица или на адресата [email protected]“, се вели во соопштението на МВР.
Ваквиот тренд ќе се шири сè додека институциите ги толерираат и не ги казнуваат тие што шират говор на омраза. Оваа „епидемија“ мора час поскоро да се искорени!
А. Петровска