Движењето Нема кралеви (No Kings) во Соединетите Американски Држави најави масовни протести во сабота, 28 март 2026 година. Организаторите ги оценуваат овие протести како потенцијално најголема граѓанска мобилизација во современата историја на земјата.
Станува збор за трета национална акција насочена против политиките на втората администрација на претседателот Доналд Трамп, со повеќе од 3.000 најавени настани низ целата земја.
Движењето ја темели својата порака на принципот дека во демократски систем не постои неограничена власт, нагласувајќи ја потребата од зачувување на институционалните контроли и балансот меѓу гранките на власта. Организаторите предупредуваат на, како што велат, засилени авторитарни тенденции и злоупотреба на федералната моќ.
Протестите ги координира широка коалиција граѓански организации, меѓу кои Indivisible, движењето 50501, Американската унија за граѓански слободи (ACLU) и синдикалната федерација AFL-CIO.
Датумот на протестите доаѓа во контекст на зголемени политички и безбедносни тензии. Особено силна реакција предизвикаа смртните случаи на Алекс Прети и Рене Гуд во Минесота, кои беа убиени од федерални агенти, што отвори прашања за употребата на сила и одговорноста на институциите.
Организаторите нагласуваат дека сите настани се планирани како строго ненасилни, со присуство на обучени тимови за деескалација.
Во пресрет на протестите, поддршка за движењето изразија и бројни јавни личности. Меѓу нив е и познатиот актер Роберт Де Ниро, кој во видео обраќање повика на заштита на демократските вредности и активен граѓански ангажман.
Robert De Niro is asking you to join us in the streets on March 28 for the biggest protest in American history: https://t.co/6me23FecVJ pic.twitter.com/KtNfLOutcS
— Donald J. Trumpstein fake (@realtrumpstein) March 21, 2026
„Време е Америка повторно да стане разумна“, порача Де Ниро, приклучувајќи се на повиците за одбрана на институциите и владеењето на правото.
Неговата порака брзо се прошири на социјалните мрежи и дополнително го засили вниманието околу протестите.
Движењето „No Kings“, кое започна во 2025 година, бележи брз раст и мобилизација на граѓаните. Според најавите, протестите на 28 март би можеле да привлечат милиони учесници.
Организаторите повикуваат на мирен отпор, граѓанска одговорност и континуиран притисок за зачувување на демократските стандарди во земјата.
ЦМ Деск
