Првото место на годинешниот конкурс на Македонски институт за медиуми, за новинарскатата награда „Никола Младенов“ за најдобра истражувачка сторија, ја добија новинарите Миомир Серафиновиќ и Снежана Лупевска-Созен.
Победничката сторија, е објавена во емисијата „Код“ на ТВ Телма, во која се истражуваа околностите за мистериозната смрт на Коста Крпач, сведок на Специјалното обвинителство и едно од аболицираните лица од претседателот Ѓорѓе Иванов. Сторијата обелодени детали и моменти поврзани со трагичниот настан коишто подоцна се потврдија во истрагата, која сè уште трае, иако Јавното обвинителство процени дека станува збор за самоубиство.
Втората награда ја доби Зоран Јованоски за видео-сторијата „Пеплиште на смртта“, објавена во емисијата „360 степени“ на ТВ Алсат-М. Сторијата ги открива застрашувачките последици по здравјето на луѓето и на животната средина, предизвикани од работењето на термоцентралата „Осломеј“, во време кога државата најавува дека ќе го продолжи нејзиниот животен век.
Третонаградена е новинарка во неделникот „Фокус“, Ирена Мулачка, за серијалот текстови кои обелоденија застрашувачки податоци за смртта на 80 новороденчиња за само шест месеци, на скопската Клиника за гинекологија .
Годинава жири-комисијата реши да им додели пофалници за истакнат новинарски ангажман на новинарите Владо Апостолов за сториите „Дамки врз тендерот за чистење на Владата“, „Како жолтата зграда прерасна во неокласичен дворец“, „Гласачи живеат во Свети Николе, ама на скопски адреси“ и серијалот истражувања за „Имотот на Владимир Здравев“, објавени на интернет-порталот „Призма“, како и на Стојанка Митреска за сторијата „Печуркарата во Свети Николе мувлоса предвреме“, исто така, објавена на интернет-порталот „Призма“.
Оваа година, МИМ по 16-ти пат ја додели наградата за најдобра истражувачка сторија на годината, како дел од заложбите за унапредување на професионалното новинарство и на демократските вредности во земјава.
