Корупцијата влијае на општествениот, политичкиот и економскиот развој на цели народи. И развиените и неразвиените земји се ранливи на корупција, а таа е најголема, таму каде што демократските вредности се слаби.
Ова го објави заменик-претседателот на Владата за борба против корупцијата и криминал, одржлив развој и човечки ресурси Љупчо Николовски на неговиот фејсбук профил денеска по повод одбележувањето на 9 декември – Меѓународниот ден за борба против корупција.
– Меѓународниот ден за борба против корупцијата е ден кога владите, стопанството, граѓанските организации и целото општество треба да ја потврдат својата посветеност да работат заедно за да стават крај на разорното влијание на корупцијата врз животите на луѓето, напиша Николовски.
Вицепремиерот Николовски потенцира дека корупцијата е закана за функционирањетo на системот, владеењето на правото, за буџетот, за економскиот развој и најважно, за животниот стандард на граѓаните во секоја држава.
– Да ставиме крај на корупцијата! Да создадеме подобро утре за сите нас. Да го симнеме превезот на тајноста и да ги расветлиме криминалните дејности! Само така ќе има правда!Сега се е јавно! Корупцијата не се исплати! Твое право, твоја должност: Кажи НЕ за корупција! , порачува Николовски преку неговиот ФБ профил.
И министерот за внатрешни работи Оливер Спасовски, денеска на неговиот Фејсбук профил се огласи по повод Меѓународниот ден за борба против корупцијата.
– Денеска, одбележувајќи го Меѓународниот ден за борба против корупцијата, со донесен План за борба против корупција, кој обилува со мерки кои како институции веќе ги имплементираме, со Кабинет на Заменик на претседателот на Владата за борба против корупцијата, како главна точка на поврзување на сите антикорупциски институции, со право можеме да кажеме дека – ставајќи ја борбата со корупцијата меѓу врвните приоритети на оваа Влада, покажавме дека тоа не е само начин на добро владеење.
– Борбата со корупцијата е најсилната алатка за самоодбрана на една држава, чин на вистински патриотизам!, објави Спасовски.
