„Ниту еден медиум не е под истрага до овој момент во ова јавно обвинителство, за да се зборува дека ние правиме директни притисоци врз медиумите. Ги знаете отворените истраги досега“, рече обвинителката Ленче Ристовска на денешната прес-конференција на Специјалното јавно обвинителство. Таа најостро ги демантираше тврдењата дека СЈО врши притисоци, како што обвини еден од присутните, Љупчо Златев, прекинувајќи го демонстративно, почетокот на прес-конференцијата, која ја напуштија претставниците на дел од провладините медиуми.
„Поради континуираниот политички притисок врз медиумите, ние одлучивме да ги спуштиме камерите и да не ги следиме вашите прес-конференции“, обвини Златев, со нескриена намера да ја дефокусира темата на прес-конференцијата на СЈО.
Според Ристовска, гестот на Златев, всушност, оневозможува дел од населението во Македонија, да биде правилно и објективно информирано за активностите на СЈО.
„СЈО работи во интерес на граѓаните и со целосно почитување на сите закони. Уште на почетокот појаснивме дека за нас, сите се еднакви пред законот и ако некој сторил кривично дело, треба да одговара. Доколку одредени лица, кои се сопственици или на друг начин се поврзани со одреден медиум, сториле кривични дела, што не се поврзани со работата на медиумите, во наш, а и во интерес на сите е, да се утврди дали навистина се направени тие кривични дела. Треба да се спроведе истрага, а наодите да покажат подоцна дали има основ за кривична одговорност“, истакна Ристовска.
СЈО за ниту едно лице од новоотворените истраги, досега не побарало мерки за обезбедување присуство, бидејќи во моментот нема таква потреба.
Помошникот министер осомничен во истрагата „Триста“, според Ристовска е осомничен и во друга истрага. Осомничените во истрагите „Тотал“ и „Тифани“ се гонат за сторено кривично дело „даночно затајување“, додека другиот дел од работењето на фирмите не е опфатен.
