„Нашата организација ги набљудуваше изборите во 2014 и 2016 година. Денеска го презентираме извештајот за превенцијата за време на избори. Превенцијата како начин на размислување е исклучително важна во општеството особено во изборниот процес. Ги посетивме сите политички партии и најодговорните политичари што се поврзани со изборите, претходниот премиер, министерот за внатрешни работи и заклучивме дека во оваа сфера има сè уште простор да се работи со цел да имаме мирни избори“ изјави Нелко Нелковски претседател на Македонскиот центар за култура и развој (МЦКР) на денешната прес-конференција пред куќата на мајка Тереза.
Многу битен факт е местото каде се одржа пресот, без никакво образложение, иако Нелковски инсистираше куќата да се гледа во позадина. Но, од она што беше презентирано можеме само да кажеме: мирни избори, мирна предизборна кампања, мирен ден на изборите, мирен пост-изборен период, односно мирни избори во 2014 и 2016 година. Ова го добиваме како извештај од МЦКР во октомври 2017 година, десет дена пред локалните избори. На прес конференцијата немаше ни објаснување зошто сега мора да ги видиме овие извештаи…
Сепак, беа споменати и овие избори… Нелковски порачува дека, превентивно, треба да се огледаме на случајот со Каталонија, не за друго, туку дека е многу битно ни капка крв да не се пролее на овие избори.
А, бидејќи двајца кандидати за градоначалници во Кичево и Шуто Оризари веќе „крвареа“ како што рече Нелковски, одговорноста е огромна на сегашната власт, па добро, и на опозицијата, другите по сè изгледа се само за бројка.
„Сето она што се случи во Каталонија, апсолутно има влијание во целиот свет, но и на нашиот изборен процес и верувам дека сите ќе извлечеме поука, дека мирот, владеењето на правото и демократијата се основните темели на кои треба да почива една современа земја како што е Република Македонија“ истакна Нелко Нелковски.
Од извештајот „Превенција за време на избори“ кој денеска се презентираше по втор пат, може уште нешто да се издвои нешто:
„Пофалба до сите вклучени институциите, политичките партии, Владата, Премиерот, министерствата и се разбира Државната изборна комисија за успешно спроведени парламентари избори 2016“, оценка за 11 декември или „Прв круг претседателски и парламентарни избори 2014 како МИРЕН, ФЕР и ДЕМОКРАТСКИ кој помина во скоро совршена изборна атмосфера… избори, кои Република Македонија ја сврстуваат во развиените демократски земји… и превенцијата во пристапот на МВР и политичките партии се покажа за прв пат на дело“.
На „Патоказот на иднината“ уште ќе чекаме, освен ако осудата за нападите врз Елвис Бајрам и Алит Абази и одговорноста што ја имаат институциите и учесниците во изборниот процес, не треба некаде да води… Дали ова беше предвидување или нешто друго, остана нејасно.
Според изјавата на Нелковски, граѓанките и граѓаните или гласачкото тело не се за пофалба, не учествуваат во избори и, по таа логика, нив ги нема во иднината. Ним не им треба едукација за превенција за време на избори.
Всушност, прашањето е што МКЦР превенира?
За потсетување, кога излезе извештајот од нивниот мониторинг на изборите во 2016, на ЦИВИЛ Медиа излезе опширен текст во кое се постави прашањето: Кои избори ги следела МКЦР? И каде?
Со дополнување, каде беа и што набљудуваа во 2014?
И, што ќе набљудуваат и каде ќе бидат на овие избори?
И за крај, дали оваа изјава е тригер за извештај на МЦКР за локалните избори, што ќе содржи реални оценки или само доказ, дека патоказот кон иднината одамна е поставен и треба да му бидеме верни до гроба?
Биљана Јордановска