На Дигиталниот Самит, кој се одржа на 18-ти и 19-ти април во Скопје, на панел дискусијата за дигиталните вештини како една од главните теми кои се обработуваа, беа дискутирани повеќе теми поврзани со дигиталните вештини, дигиталната писменост и дигиталната трансформација.
На дебатата учествуваа 6 говорници од неколку земји, претставник од Македонија беше Валентина Тасева, претставник на Стопанска комора на Македонија и генерална директорка на Семос Едукација.
„Износот кој се создава заради недоволен број на ИТ едуцирани кадри ќе се намалува преку две решенија. Првото решение е ИТ едукација на сите нивоа, не само во неформалното образование, туку пред сѐ, во формалното образование. Ако сакаме да обезбедиме доволно дигитално писмени луѓе кои можат да одговорат на потребите на бизнисот, нив мора да ги обучиме, сега веќе не само на универзитетите, туку и во средните училишта. За жал, која е нашата пракса? Бројката на студенти кои се ИТ едуцирани, при што не зборуваме само за програмери, а излегуваат од универзитетите, е далеку од доволна за потребите на бизнисите. Тука е второто решение, кое лежи во промена не законската регулатива, веќе воведено во Романија и Полска, кои овој проблем го решаваат со воведување на индустриски, глобално признаен сертификат како дел од матурските испити. Сите оние средношколци, кои веќе вложиле во своето ИТ знаење и положиле испити од Мicrosoft, Adobe, Autodesk, или било кој друг бренд, се признаени не само од државата дека имаат еден положен испит, туку се прифатени и од индустријата за побрзо вработување“, истакна Тасева.
Модератор на дискусијата беше Зоја Кукиќ, партнер и член на бордот на SEE ICT Србија, а говорници беа и Александар Ридл, шеф на единицата Дигитална економија и вештини, Ник МекЛин, генерален директор на Niel McLean Associates, Валдрин Лука, министер за економски развој на Косово, Шрини Гопалан, член на Бордот на директори на Дојче Телеком и Шади Матар, советник на министерот за комуникации и транспорт на Босна и Херцеговина.
Главните заклучоци од широката дискусија беа дека дигиталните вештини се многу важна тема на која треба да се посвети големо внимание. Формалните институции и Владата треба да преземат иницијатива, особено во смисла на донесување разноликост и едукација за сите подеднакво, како и неопходност од промени во образовните модели.
А.П.
