Нов Зеланд планира да ја отвори својата граница од почетокот на 2022 година и да им овозможи на вакцинираните патници од земјите со низок ризик да влезат без задолжителниот карантин, што сега е во важност, соопшти денеска премиерката на Нов Зеланд, Јасинда Ардерн.
Од март 2020 година, Нов Зеланд целосно ја затвори својата граница за сите, освен нејзините граѓани и лица со дозволи за престој. Во април годинава границата беше кратко отворена за граѓаните на соседна Австралија, но повторно се затвори кон крајот на јули, откако Австралија се соочи со нови жаришта на заразата.
Строгата политика за елиминација резултираше со само 2.500 регистрирани случаи на инфекција со коронавирус во Нов Зеланд и вкупно 26 смртни случаи.
Ардерн кажа дека од 1 септември, три месеци пред предвиденото, вакцината ќе биде достапна за секој што ги исполнува условите.
-Порано велев дека границата е нашиот колективен оклоп што не штити од вирусите. Идејата за вакцинација е секој од нас да добие свој оклоп, што значи дека ќе можеме помалку да се потпираме на чување на границата, или барем не само тоа, рече Ардерн на форумот за повторно поврзување на Новозеланѓаните со остатокот од светот.
Откако ќе се зголеми бројот на вакцинирани, може да почне постепено повторно отворање на границата, додаде таа.
Австралиската престолнина Канбера влезе во еднонеделен општ карантин на ниво на градот, откако во него беше откриен случај на инфекција со Ковид-19, првпат во текот на последната година.
Карантинот стапува на сила денеска во 17 часот по локално време, пренесе Би -Би -Си.
Побарано е затворање на целата територија на австралиската престолнина, каде живеат околу 400.000 луѓе, бидејќи властите не знаат како лицето се заразило.
Жителите ќе можат да ги напуштат своите домови само заради неопходни причини, па од затоа веќе сега има турканици во продавниците, пред мерката да стапи на сила.
Австралија се обидува да го спречи ширењето на делта сојот на вирусот, па затоа веќе се воведени карантини во двата најголеми града, Мелбурн и Сиднеј.
Владата на Нов Јужен Велс соопшти дека армијата ќе излезе на терен за да го обезбеди почитувањето на локдаунот.
