Русија продолжи со воздушни напади врз Украина во ноќта и утрото на 11 септември. Цел на дроновите повторно беа цивилите и цивилните објекти во Кијив и во повеќе населени места низ земјата. Според украинските власти и меѓународните извештаи, во главниот град биле оштетени станбена зграда и бензински пумпи, а нападите предизвикале пожари, експлозии и нова воздушна тревога во градот.
Во овој контекст, амбасадорката на Украина во Северна Македонија, Лариса Дир, утрово предупреди дека целта на руските напади не е мир, туку уништување на мирниот живот во Украина.
„Како последица на удар на руски дрон за време на ноќниот напад врз Кијив, оштетена е станбена зграда. Сега во Кијив е прогласена воздушна тревога, одекнуваат експлозии, се издига чад од руските напади врз бензински пумпи. Целта на рф не е мир, туку уништување на мирниот живот на Украина“, напиша Дир на платформата X.
Како последица на удар на руски дрон за време на ноќниот напад врз Кијив, оштетена е станбена зграда. Сега во Киjив е прогласена воздушна тревога,одекнуваат експлозии,се издига чад од руските напади врз бензински пумпи. Целта на рф не е мир, туку уништување на мирниот живот на 🇺🇦 pic.twitter.com/R0e8mkCynl
— Larysa Dir (@dir_larysa) September 11, 2026
Има и нови елементи во нападите на агресорот – за првпат се употребуваат реактивни дронови за напад на бензиските пумпи во Кијив. Според извештајот, погодени биле три бензински пумпи на „Укрнафта“, меѓу нив во Почајна и Десњанскиот реон, а сведоци пријавиле повеќе експлозии што потсетуваат на тактика на повторен удар врз истата зона. Оваа тактика има цел да ги онеспособи спасувачките екипи.
Овие напади се дел од засилената руска кампања против цивилите и цивилната инфраструктура, како што се станбени згради, бензински пумпи, трговски објекти, логистика, енергетика и јавни услуги.
Кијив веќе со недели живее под засилени воздушни тревоги, прекини во секојдневниот ритам и растечки притисок врз противвоздушната одбрана. Употребата на побрзи, реактивни дронови создава дополнителен товар за украинската ПВО, предизвикува чести тревоги, прекини во снабдувањето и нарушување на транспортот, училиштата и снабдувањето со основни производи во главниот град.
Во исто време, Украина продолжува со својата стратегија на „долгометни санкции“ врз руската енергетска, логистичка и воена инфраструктура што ја одржува војната. Украински дронови погодиле цели во руските региони Тула, Саратов и Волгоград, при што биле оштетени цивилна и логистичка инфраструктура, меѓу нив и магацински капацитети. Украински извори објавија вести и за украински напади врз постројки за гориво и во рускиот Арктик, на речиси 2.000 милји од Украина, што укажува на зголемен дострел на украинските беспилотни системи.
Паралелно, дипломатските напори продолжуваат, но нападите не запираат. И покрај новите разговори и посреднички обиди, воздушната војна се интензивира, а Украина бара дополнителни системи Patriot и друга противвоздушна и противбалистичка одбрана за заштита на градовите пред зимата.
ЦМ Деск
