ЦИВИЛ го започна проектот Направи разлика: Почитувај ги различностите во соработка со Министерството за надворешни и европски прашања на Големото војводство Луксембург. Проектот е продолжение на минатогодишната извонредно успешна иницијатива Обединети во различноста.
Направи разлика: Почитувај ги различностите е проект за промовирање на мултикултурализмот и европските вредности. Проектот има цел да ги ублажи разорните последици од етничката омраза и антизападните кампањи, преку кампања за јакнење на јавната свест, медиумска продукција и настани што ќе се фокусираат на позитивните пораки за мултикултурализмот и европските вредности.
Во месеците што доаѓаат, ЦИВИЛ ќе покани јавни личности, креатори на јавното мислење, експерти, политичари и граѓанки и граѓани да зборуваат за различностите и европските вредности.
Во последните месеци од минатата година, со преку 100 најразлични медиумски прилози за само два месеци, со бројни видео и ликовни пораки, колумни, интервјуа, анализи и цитати, ЦИВИЛ ја поведе Иницијативата „Обединети во различноста“, заедно со голем број јавни личности, експерти и претставници од различни сфери на општествено-политичкиот и академскиот живот во Северна Македонија.
Онлајн реакциите ги надминаа и најпозитивните очекувања на тимот што ја спроведува Иницијативата. Наспроти десетици илјади лајкови и позитивни коментари, имаше минорна бројка од негативни реакции и коментари кои, како што оцени Дескот на ЦИВИЛ за мониторинг на лажните вести и говорот на омразата, се претежно оркестрирани и упатени во организиран манир од познатите трол фабрики.
Како што најави организацијата, оваа значајна иницијатива продолжува и оваа година, со уште побогати содржини со видео пораки, интервјуа, колумни, што ќе бидат објавувани на медиумската платформа на ЦИВИЛ Медиа, на македонски и албански јазик.
Како потсетник за минатогодишната иницијатива на ЦИВИЛ Обединети во различноста, читателите во продолжение можат да ги проследат стоте пораки од учесниците на иницијативата.